35سال پرانے فیصلے کی پلٹیمرکز اور مختلف کان کنی کمپنیوں کے اعتراضات مسترد

رائلٹی کوئی ٹیکس نہیں ہے ، ریاستوں کو معدنیات اور کانوں پر ٹیکس لگانے کا حق ہے :سپریم کورٹ
نئی دہلی/سپریم کورٹ نے 35 سال پرانے فیصلے کو پلٹتے ہوئے جمعرات کو کہا کہ رائلٹی ٹیکس نہیں ہے اور ریاستوں کو معدنیات اور کانوں پر ٹیکس لگانے کا حق ہے۔عدالت عظمیٰ کے نو رکنی آئینی بنچ نے مرکز اور مختلف کان کنی کمپنیوں کے اعتراضات کو مسترد کرتے ہوئے آٹھ ایک کے اکثریتی فیصلے کے ذریعے 1989 کی سات رکنی بنچ (انڈیا سیمنٹ لمیٹڈ بمقابلہ تمل ناڈو حکومت) کے فیصلے کو ایک طرف رکھ دیا جس میں کہا گیا تھا کہ ریاستوں کو ٹیکس لگانے کا کوئی حق نہیں ہے ۔چیف جسٹس ڈی وائی چندر چوڑ اور جسٹس رشی کیش رائے ، جسٹس ابھے ایس اوکا، جسٹس بی وی ناگرتھنا، جسٹس جے بی پارڈی والا، جسٹس منوج مشرا، جسٹس اجول بھویان، جسٹس ستیش چندر شرما اور جسٹس آگسٹین جارج مسیح کی آئینی بنچ نے یہ اہم فیصلہ سنایا۔ جسٹس ناگرتھنا نے تاہم اکثریتی فیصلے سے اختلاف کیا۔آئینی بنچ نے کہا کہ مائنز اینڈ منرلز (ڈیولپمنٹ اینڈ ریگولیشن) ایکٹ (مائنز ایکٹ) ریاستوں کو معدنی حقوق پر ٹیکس لگانے کے اختیار سے محروم نہیں کرے گا۔ عدالت عظمیٰ کے اس اکثریتی فیصلے میں کہا گیا ہے کہ رائلٹی کوئی ٹیکس نہیں ہے اور مقننہ کو قانونی حاصل ہے کہ وہ معدنیات پر مشتمل زمین پر ٹیکس عائد کرے ۔جسٹس چندرچوڑ کی سربراہی والی بنچ نے اکثریتی فیصلے میں کہا کہ پارلیمنٹ کو معدنی حقوق کے تحت ٹیکس لگانے کا اختیار نہیں ہے ، لیکن وہ اس حد کا تعین کر سکتی ہے جس پر (ریاست کی طرف سے ) ٹیکس لگایا جا سکتا ہے ۔منرل ایریا ڈویلپمنٹ اتھارٹی اور دیگر نے سات رکنی بنچ کے فیصلے کو چیلنج کیا تھا۔ اوڈیشہ اور جھارکھنڈ وغیرہ نے دلیل دی تھی کہ آئین کے مطابق صرف ریاستوں کو ٹیکس لگانے کا حق ہے ۔