رام بن میں ٹینکر گہری کھائی میں جاگرا ، ڈرائیور لقمہ اجل
صفا کدل سرینگر میں دریائے جہلم میں چھلانگ لگانے والے شخص کی لاش کی تلاش کےلئے نیوی کی خدمات حاصل
سرینگر/یکم مارچ ////سرینگر میں ایک شخص نے دریائے جہلم میں چھلانگ لگاکر اپنی زندگی کا خاتمہ کیاجس کی لاش ڈھونڈنے کےلئے نیوی کے اہلکاروں کو بلایا گیا ہے ۔ جبکہ پلوامہ میں نوجوان نے مبینہ طور پر خود کو رسی سے لٹکاکر خود کشی کرلی ہے ۔ ادھررام بن میں ایک ٹینکر گہری کھائی میںگرنے سے ڈرائیور لقمہ اجل بن گیا ۔ وائس آف انڈیا سرینگر کے صفا کدل علاقے کے قریب کل دریائے جہلم میں چھلانگ لگانے والے 55 سالہ شخص کی لاش کو نکالنے کے لیے سرچ آپریشن مسلسل دوسرے دن بھی جاری ہے جب کہ ہندوستانی بحریہ کے مارکوس کمانڈوز کو بھی اس سرچ آپریشن میںشامل کیا گیا ہے۔ ذرائع کے مطابق عیدگاہ کے نذیر احمد متو جس کی عمر قریب 55برس بتائی جاتی ہے نے جمعرات کو صفا کدل کے قریب دریائے جہلم میں چھلانگ لگا دی۔اس کے فوراً بعد اسے بچانے کے لیے تلاش شروع کی گئی لیکن اس کا کوئی نتیجہ نہیں نکلا اور شام کو آپریشن ختم کر دیا گیا۔اور جمعہ صبح تلاشی دوبارہ شروع کی گئی جبکہ اس آپریشن میں مارکوز کمانڈوز کو بھی شامل کیا گیا ہے ۔ ایس ڈی آر ایف اور ریور پولیس بھی ان کی مدد کر رہی ہے، لیکن لاش ابھی تک برآمد نہیں ہوئی ہے۔دریں اثناءجنوبی کشمیر کے ضلع پلوامہ کے راجپورہ علاقے میں جمعہ کے روز اُس وقت سنسنی کا ماحول پھیل گیا جب ایک نوجوان نے مبینہ طو رپر خود کو رسی سے لٹکاکر اپنی زندگی کا خاتمہ کیا ۔ وی او آئی نمائندے کے مطابق 25سالہ نوجوان گبر پورہ راجپورہ پلوامہ کو اپنے ہی گھر میں رسی سے لٹکتا ہوا پایا گیا جس کو فوری طور پر ہسپتال پہنچایا گیا جہاں ڈاکٹروں نے اسے مردہ قراردیا ۔ ادھرپولیس نے اس واقعے کی تصدیق کرتے ہوئے بتایاکہ اس معاملے میں کیس درج کرکے مزید تحقیقات شروع کردی گئی ہے ۔ ادھر سرینگرجموں قومی شاہراہ پر جمعہ کو رام بن ضلع کے منی موڑ علاقے کے قریب گاڑی گہری کھائی میں گرنے سے ایک ٹینکر کے ڈرائیور کی موت ہو گئی۔ذرائع نے بتایا کہ آئل ٹینکر جموں سے سری نگر کی طرف جا رہا تھا۔انہوں نے بتایا کہ بندر موڑ پر ڈرائیور نے اپنا کنٹرول کھو دیا اور گاڑی ہائی وے سے 1500 فٹ نیچے جاگری۔ڈرائیور کی لاش برآمد کر لی گئی ہے، لیکن ابھی تک اس کی شناخت نہیں ہوسکی ہے ۔
