چیف سیکرٹری نے سرینگر سمارٹ سٹی کے جاری کاموں کی سائٹس کا دورہ کیا

کاموں کو جلد مکمل کرنے کیلئے کام کی رفتار میں تیزی لانے کی ہدایت
ریور فرنٹ اور سرینگر پلازہ کو مستقبل کا ایک بڑا پُرکشش مقام قرار دیا
چیف سیکرٹری ڈاکٹر ارون کمار مہتا نے سرینگر سمارٹ سٹی مشن کے تحت جاری ترقیاتی اور بیوٹیفکیشن کے کاموں کا موقع پر جائیزہ لینے کیلئے سرینگر شہر کا ایک وسیع دورہ کیا ۔ چیف سیکرٹری کے ہمراہ ڈویژنل کمشنر کشمیر ، ڈپٹی کمشنر سرینگر ، کمشنر ایس ایم سی اور سی ای او سرینگر سمارٹ سٹی ، وی سی لیکس کنزرویشن اینڈ منیجمنٹ اتھارٹی ، وی سی ایس ڈی اے اور لائن ڈیپارٹمنٹ کے دیگر متعلقہ افسران تھے ۔ دورے کے دوران چیف سیکرٹری نے مومن آباد بٹہ مالو ، ٹٹو گراو¿نڈ ، جہلم ریور فرنٹ ڈیولپمنٹ پروجیکٹ ، روائتی سوق مارکیٹ اینڈ کرافٹ سنٹر ، گھنٹہ گھر ، سرینگر پلازہ ، نشاط گارڈن کے علاقے ، ناردرن فورشور روڈ اور شالیمار کینال کا دورہ کیا ۔ ڈاکٹر مہتا نے مشاہدہ کیا کہ گھنٹہ گھر کے قریب سرینگر پلازہ کے ساتھ ترقی یافتہ جہلم ریور فرنٹ شہر میں اہم پرکشش مقامات بننے جا رہے ہیں ۔ انہوں نے متعلقہ افسران کو ہدایت دی کہ کام کی رفتار کو مزید تیز کیا جائے اور ان تمام پروجیکٹوں کی جلد از جلد تکمیل کو یقینی بنایا جائے ۔ نشاط میں ڈل جھیل کی صفائی کی پیش رفت کا جائیزہ لیتے ہوئے چیف سیکرٹری نے آبی ذخائیر کی صفائی پر اطمینان کا اظہار کیا ۔ انہوں نے جھیل کو دلکش بنانے اور روزی روٹی کمانے کیلئے ڈل میں واٹر سپورٹس کی سرگرمیاں شروع کرنے کی بھی ہدایت دی ۔ ڈاکٹر مہتا نے مشاہدہ کیا کہ اسمارٹ سٹی پروجیکٹ کی تکمیل کی تیز رفتاری سے شہر تیزی سے بہتر ہو رہا ہے ۔ انہوں نے مزید کہا کہ یہ جاری کام شہر کو ایک بڑے پیمانے پر نقش و نگار فراہم کریں گے۔ڈل جھیل کے دورے کے دوران ڈاکٹر مہتا نے نشاط سے نسیم باغ تک جھیل کے ناردرن فورشور روڈ کے ساتھ لیک فرنٹ ڈیولپمنٹ کے کام کا معائینہ کیا جس میں پیدل چلنے والے راستے ، سائیکل ٹریک کی تعمیر اور ویوونگ ڈیکس بھی شامل ہیں ۔ چیف سیکرٹری نے تمام ہاوس بوٹس کو ایس ٹی پیز سے جوڑنے کی ضرورت پر روشنی ڈالی ۔ انہوں نے سیوریج ٹریٹمنٹ کی 36 ایم ایل ڈی صلاحیت کو بہترین طریقے سے استعمال کرنے اور جھیل میں موجود تمام 900 ہاوس بوٹس کو فوری طور پر سیوریج لائنوں سے جوڑنے کی ہدایت دی ۔ چیف سیکرٹری نے نشاط باغ کے علاقے کی اپ گریڈیشن اور ری ڈیولپمنٹ کے کاموں کا بھی جائیزہ لیا جس میں الائیڈ روڈ ورکس ، پاتھ ویز ، پلازہ ، لکڑی کے ڈیک اور اس کے اطراف کی لینڈ سکیپنگ بشمول شالیمار کینال کی ترقی شامل ہے ۔ عمل آوری ایجنسیوں کی طرف سے چیف سیکرٹری کو یقین دلایا گیا کہ وہ ان تمام منصوبوں کو جلد از جلد مکمل کرنے کیلئے پرعزم ہیں ۔