ڈائریکٹر ٹورازم کشمیر نے ڈل گیٹ، بلوارڈکا دورہ کیا

سیاحت سے جڑے افراد اور ٹورسٹوں کے ساتھ تبادلہ خیال کیا
سرینگر/کشمیر کے ڈائریکٹر ٹورازم راجہ یعقوب نے آج سرینگر شہر کے ڈلگیٹ اور بلوارڈ روڈ علاقوں کا دورہ کیا اور سیاحوں کے ساتھ ان کو متعلقہ اسٹیک ہولڈرز کی طرف سے فراہم کی جانے والی خدمات کے بارے میں تفصیلی بات چیت کی۔دورے کے دوران ڈائریکٹر نے ملکی اور بین الاقوامی سیاحوں سے بات چیت کی اور کئی معاملوں پر ان سے جانکاری حاصل کی ۔ ڈائریکٹر ٹورازم نے سیاحوں کو محکمے کے مسلسل تعاون کے عزم کا یقین دلایا اور سیاحت کے مجموعی انفراسٹرکچر اور خدمات کو بڑھانے کے لیے ان کے تاثرات پر عمل درآمد کا وعدہ کیا۔اس دوران سیاحوں کے ایک گروپ نے ڈائریکٹر کے ساتھ اوور چارجنگ اور دھوکہ دہی کا معاملہ اٹھایا۔اس معاملے کا فوری نوٹس لیتے ہوئے ڈائریکٹر نے ٹورسٹ پولیس اور محکمہ کے دیگر افسران کی ٹیم کے ساتھ سیاحوں کو زائد وصول کی گئی رقم واپس کی اور خلاف ورزی کرنے والے خدمات فراہم کرنے والوں کے خلاف سخت کارروائی کی ہدایت کی۔بعد ازاں ڈائریکٹر نے مقامی دکانداروں اور دیگر سیاحت سے جڑے افراد سے بھی بات چیت کی اور سیاحت کے ماحولیاتی نظام میں ان کے تعاون کی تعریف کی۔ انہوں نے ان سے کہا کہ وہ سیاحوں کو خدمات فراہم کرتے ہوئے کسی بھی قسم کی کوتاہی سے باز رہیں کیونکہ اس سے آنے والے مہمانوں پر برا تاثر جاتا ہے۔