وزیر دفاع راج ناتھ سنگھ نو منتخب صدر احمد ٹینوبو کی تقریب حلف برداریمیں شرکت کے لیے نائیجیریا کا دورہ کریں گے

 نئی دلی\وزارت دفاع نے ایک سرکاری بیان میں کہا کہ وزیر دفاع راج ناتھ سنگھ نائیجیریا کے تین روزہ دورے پر روانہ ہونے والے ہیں، جہاں وہ مغربی افریقی ملک کے منتخب صدر بولا احمد ٹینوبو کی حلف برداری کی تقریب میں بھی شرکت کریں گے۔  راج ناتھ سنگھ 29 مئی کو ابوجا کے ایگل اسکوائر میں حلف برداری کی تقریب میں شرکت کریں گے۔سرکاری بیان کے مطابق، وہ 28 مئی کو نائیجیریا کے سبکدوش ہونے والے صدر محمدو بوہاری سے بھی ملاقات کریں گے۔ یہ کسی ہندوستانی وزیر دفاع کا نائیجیریا کا پہلا دورہ ہوگا۔وزیر دفاع کا مغربی افریقی ملک کا دورہ دونوں ممالک کے درمیان دوستی کے مضبوط رشتوں کو استوار کرنے میں ایک اہم سنگ میل ثابت ہوگا۔ ہندوستان اور نائیجیریا کے درمیان بڑھتے ہوئے دفاعی تعاون کو دیکھتے ہوئے، وزارت دفاع کے سینئر افسران اور اہم دفاعی  پبلک  سیکٹر انڈر ٹیکنگ کی اعلیٰ قیادت راجناتھ سنگھ کے ساتھ ہوگی۔سرکاری پریس ریلیز میں کہا گیا ہے کہ وہ نائیجیریا کی صنعت اور مسلح افواج کے نمائندوں کے ساتھ میٹنگ کریں گے تاکہ آلات اور پلیٹ فارمز کی نشاندہی کی جا سکے، جس کے ذریعے ہندوستانی دفاعی صنعت ملک کی ضروریات کو پورا کر سکتی ہے۔ نائیجیریا ایک اندازے کے مطابق ہندوستانی کمیونٹی کے 50,000 ارکان کا گھر ہے۔ وزیر دفاع اس دورے کے دوران ابوجا میں ہندوستانی تارکین وطن سے بھی خطاب کریں گے۔