این آئی اے کی جانب سے جموں وکشمیر میں 18مقامات پر چھاپہ ماری

ایک شخص گرفتار، موبائیل فونز ، اہم کاغذات اور قابل اعتراض مواد ضبط /این آئی اے
قومی تحقیقاتی ایجنسی (این آئی اے ) نے منگل کے روز جموں وکشمیر میں 18مقامات پر چھاپے ڈالے جس دوران قابل اعتراض مواد کے ساتھ ساتھ ایک شخص کو بھی حراست میں لیا گیا۔ تفصیلات کے مطابق قومی تحقیقاتی ایجنسی این آئی اے کی ایک اعلیٰ سطحی ٹیم نے منگل کی صبح جموں اور کشمیر صوبے میں اٹھارہ مقامات پر چھاپے مارے ۔ ترجمان کے مطابق فنڈنگ کیس کے سلسلے میں چھاپے ڈالے گئے جس دوران نہ صرف بڑی مقدار میں قابل اعتراض مواد برآمد کرکے ضبط کیا گیا بلکہ ایک شخص کو بھی حراست میں لیا گیا ہے۔ انہوں نے کہاکہ جماعت اسلامی پر پابندی عائد کرنے کے باوجود بھی اس کی ذیلی تنظیمی چندہ جمع کررہی ہیں اور ان پیسوں کو تخریبی سرگرمیوں کے لئے استعمال میں لایا جارہا ہے۔ این آئی اے ذرائع کے مطابق اس بات کا بھی پتہ چلا ہے کہ کشمیر میں قائم بعض این جی اوز اور ٹرسٹس اس کے ساتھ جڑے ہوئے ہیں اور اُنہیں بھی بہت جلد تحقیقات میں دائرے میں لایا جائے گا۔ این آئی اے نے بتایا کہ چھاپہ ماری کے دوران بڑی مقدار میں قابل اعتراض مواد برآمد کرکے ضبط کیا گیا۔ واضح رہے کہ مرکزی وزیر داخلہ امیت شاہ کے حالیہ دورے جموں وکشمیر کے دوران ایک اعلیٰ سطحی میٹنگ منعقد ہوئی جس دوران ملی ٹینسی کے ایکو سسٹم کو تباہ و برباد کرنے کی ہدایت دی گئی۔ امیت شاہ نے میٹنگ کے دوران آفیسران کو ہدایت دی کہ ملی ٹینسی کو پنپنے کا کسی بھی صورت میں موقع فراہم نہیں ہو نا چاہئے اور یہ کہ ملی ٹینسی کو فروغ دینے کی خاطر جو فنڈنگ چینلز استعمال میں لائی جارہی ہیں اُن کے خلاف بڑے پیمانے پر کریک ڈاون شروع کرنے کی ضرورت ہے۔ ذرائع نے بتایا کہ وزیر داخلہ کی ہدایت پر ہی جموں وکشمیر میں ملک دشمن عناصر کے خلاف کریک ڈاون شروع کیا گیا ہے۔