کولگام میں تین منشیات فروش گرفتار

بڑی مقدار میں ممنوع نشیلی اشیاءضبط
کولگام پولیس نے تین بد نام زمانہ منشیات فروشوں کو حراست میں لے کر اُن کے قبضے سے ممنوع نشیلی اشیاءبرآمد کرکے ضبط کی۔ اطلاعات کے مطابق سماج کو منشیات سے پاک کرنے کی مہم کے تحت یاری پورہ پولیس نے ایس ڈی پی او کی ہدایت پر سنمان پُل کے نزدیک ناکہ لگایا جس دوران ایک سینٹرو کو روک کر اُس کی تلاشی لی۔ پولیس بیان کے مطابق سینٹرو سے 16کلو ممنوع نشیلی اشیاءبرآمد ہوئی ۔ انہوں نے بتایا کہ کار میں سوار شیراز احمد لون ، کمل جیت سنگھ اور چرن جیت سنگھ کو حراست میں لے کر مزید تحقیقات شروع کی گئی ہے۔ پولیس نے بتایا کہ مذکورہ افراد کے خلاف ایف آئی آر زیر نمبر 5/2022زیر دفعات 8/15این ڈی پی ایس ایکٹ کے تحت کیس درج کرکے مزید تحقیقات شروع کی ہے۔ پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں پولیس کو مطلع کریں۔ا نہوںنے بتایا کہ منشیات کاکاروبار کرنے والے سماج کے لئے ناسور بن گئے ہیں لہذا اُن کے خلاف کارروائی عمل میں لانا اب ناگزیر بن گیا ہے۔