مندر سے چوری کی گئی 8 کروڑ روپے کی کانسہ کی مورتی امریکہ میں برآمد

چنئی، 02 اکتوبر (یو این آئی) ایک اہم پیش رفت میں، تمل ناڈو پولیس کے آئیڈل ونگ سی آئی ڈی نے کانچی پورم کے لارڈ ایکمبریشور مندر سے چوری شدہ تقریباً 8 کروڑ روپے مالیت کے لارڈ سومسکندر کی قدیم کانسہ کی مورتی کو امریکہ کے سان فرانسسکو کے ایشین آرٹ میوزیم میں تلاش کرلیا ہے ۔یہ مورتی تمل ناڈو کے ثقافتی ورثے کا ایک اہم حصہ ہے ۔ اس خبر سے ریاست کے لوگوں میں خوشی کی لہر دوڑ گئی ہے ۔امریکہ میں مورتی ملنے کے بعد منگل کو انڈین جسٹس کوڈ (بی این ایس) اور نوادرات اور آرٹ ٹریژرز ایکٹ کی مختلف دفعات کے تحت معاملہ درج کیا گیا۔ایڈیشنل ڈپٹی سپرنٹنڈنٹ آف پولیس کی قیادت میں ایک تفتیشی افسر کی تقرری کی گئی ہے تاکہ مورتی کی تمل ناڈو میں جلد واپسی کو یقینی بنایا جا سکے اور کیس کے تمام ملزمان کو گرفتار کیا جا سکے ۔بدھ کو آئیڈل ونگ (آئی ڈبلیو) سی آئی ڈی کی طرف سے جاری کردہ ایک پریس ریلیز میں کہا گیا ہے کہ تملناڈو کے مندروں سے بیرون ملک مورتیوں کی غیرقانونی اسمگلنگ کی تفتیش کرنے کے لئے آئی جی آئی ڈبلیو سی آئی ڈی ڈاکٹر آر دیناکرن، آئی جی پی، آئی ڈبلیو سی آئی ڈی کی رہنمائی میں ڈاکٹر آر شیوکمار، ایس پی، آئی ڈبلیو سی آئی ڈی کی براہ راست نگرانی میں خصوصی ٹیمیں تشکیل دی گئی ہیں اور ان کو تعینات کیا گیا ہے ۔ان ٹیموں کو چوری شدہ مورتیوں کی شناخت کے لیے غیر ملکی عجائب گھروں، نجی آرٹ گیلریوں اور نوادرات کے ذخیرے کی ویب سائٹس کو تلاش کرنے کا کام سونپا گیا ہے۔