اقدامات اُٹھائے گئے ،لیفٹیننٹ گورنر نے اضافی بجلی خریدنے کےلئے پینل تشکیل دیا
سرینگر/وادی کشمیر میں بجلی کی ابتر صورتحال کے بیچ صوبائی کمشنر وجے کمار بدھوری نے بدھ کے روزکہا کہ بجلی کی سپلائی میں بہتری لانے کےلئے اقدامات اُٹھائے جارہے ہیں اور امید ہے کہ ایک ہفتے تک بجلی کی ترسیل بہتر ہوگی ۔ انہوںنے بتایا کہ غیر اعلانیہ بجلی کٹوتی پر روک لگائے جائے گی۔ بدھوری نے کہا کہ لیفٹیننٹ گورنر اور چیف سیکریٹری نے اضافی بجلی حاصل کرنے کےلئے ایک کمیٹی تشکیل دی ہے اور بہت جلد بہتر نتائج سامنے آئیں گے ۔ وائس آف انڈیا کے مطابق ڈویڑنل کمشنر کشمیر وجے کمار بدھوری نے بدھ کو کہا کہ وادی میں بجلی کی صورتحال ایک ہفتے کے اندر بہتر ہونے کی امید ہے۔نامہ نگاروں سے بات کرتے ہوئے بیدھوری نے کہا کہ یہ حقیقت ہے کہ پہلے اعلان کردہ بجلی کے شیڈول پر عمل نہیں کیا جا رہا ہے کیونکہ کشمیر میں سردیوں کے ابتدائی آغاز کی وجہ سے بجلی کی طلب اچانک بڑھ گئی ہے۔ انہوں نے کہاکہ ہم بجلی کے منظر نامے میں بہتری کی توقع کر رہے ہیں کیونکہ لیفٹیننٹ گورنر منوج سنہا اور چیف سکریٹری نے بجلی کی خریداری کے معاملے پر ایک کمیٹی تشکیل دی ہے اور اس سلسلے میں جلد ہی فیصلہ متوقع ہے۔انہوں نے مزید کہا کہ حکومت عوام کی تکالیف سے بخوبی آگاہ ہے کیونکہ بجلی کی غیر اعلانیہ کٹوتی زیادہ تکلیف دہ ہوتی ہے تاہم انتظامیہ کی توجہ بجلی کے منظر نامے کو بہتر بنانے پر مرکوز ہے اور توقع ہے کہ ایک ہفتے کے اندر اس میں بہتری آئے گی۔بدھوری نے کہا کہ رواں برس سخت سردی کی وجہ سے بجلی کی کھپت میں بھی اضافہ ہوا ہے اور متعلقہ محکمہ نے جو بجلی کی خرید اور اس کی کھپت کا اندازہ لگایا تھا اس سے کہیں زیادہ بجلی خرچ ہورہی ہے ۔ انہوںنے بتایا کہ ایل جی انتظامیہ لوگوں کو بلا خلل بجلی فراہم کرنے کےلئے اقدامات اُٹھائے گی ۔ واضح رہے کہ وادی کشمیر میں بجلی کا بحران شدید ہوتا جارہا ہے اور رواں برس جو بجلی کی ابتر صورتحال سامنے آرہی ہے اس سے قبل نہیں دیکھی گئی ہے ۔ ادھر صارفین کا بھی کہنا ہے کہ سخت سردی کے سبب بجلی کی ضرورت بڑھ گئی ہے البتہ صارفین کا کہنا ہے کہ مقرر کردہ شیڈول مطابق اگر بجلی فراہم کی جائے گی تو اس سے کافی راحت ملے گی ۔
