گھروں میں گھس کر پہنچارہے ہیں نقصان ، لوگ ہجرت کرنے پر مجبور
سرینگر//جنوبی ضلع اننت ناگ کے سیاحتی مقام پہلگام علاقے میں بندروں نے لوگوں کا جینا حرام کردیا ہے جبکہ بندر گھروں میں گھس کر سامان کو تہس نہس کرتے ہیں۔ وائس آف انڈیا کے نمائندے امان ملک کے مطابق جنوبی کشمیر کے پہلگام علاقے میں بندروں نے لوگوں کی نیندیں حرام کرکے رکھ دیں ہیں۔ ضلع اننت ناگ کے پہلگام میں بندروں کی تعداد اس قدر بڑھ گئی ہے کہ لوگ ہجرت کرنے پر مجبور ہوگئے ہیں۔ لوگوں نے نمائندے کو بتایا کہ محکمہ کا کہیں اتہ پتہ نہیں ہے اور نا ہی وہ ان بے لگام بندروں کو قابل میں کرنے کےلئے کوئی اقدام ا ٹھارہے ہیں۔ بتایا جاتا ہے کہ بندروں کی تعداد اس قدر بڑھ گئی ہے کہ وہ لوگوں کے گھروں میں گھس کر وہاں موجود سامان کو تہس نہس کرکے جو چیز پسند آئے اس کو اپنے ساتھ ا ٹھاکے لے جاتے ہیں۔ مقامی لوگوں کے مطابق بندروں کی ہڑبونگ کی وجہ سے لوگ اب ہجرت کرنے پر مجبور ہوگئے ہیں۔ لوگوں نے کہا کہ وہ گھروں میں پہرہ دینے سے بھی کتراتے ہیں کیوں کہ ایک یا دو اشخاص کا گھر میں پہرہ دینا کسی خطرے سے خالی نہیں اور اس سے جان کاخطرہ بھی بڑھ جاتا ہے اور اکثر گاﺅں والے آٹھ دس افراد پر مشتمل ٹولیوں میں ٹین بجابجاکر بندروں کو گھروں اور دکانوں سے دور رکھتے ہیں۔لوگوں نے محکمہ وائلڈ لائف کے اعلیٰ افسران سے اپیل کی ہے کہ وہ اس معاملے کی سنگینی کو سمجھ کر بندروں کو قابل کرنے کےلئے اقدامات اٹھائیں۔
