یوکرین میں فوج بھیجنے کا منصوبہ نہیں

واشنگٹن(یو این آئی/ اسپوتنک) امریکی صدر جو بائیڈن نے کہا ہے کہ امریکہ کبھی بھی یوکرین میں فوج بھیجنے کا ارادہ نہیں رکھتا لیکن روسی صدر ولادیمیر پوٹن کو کسی بھی جارحیت کے خلاف خبردار کیا گیا ہے کہ کسی بھی طرح کی جارحیت کے حالات میں خطرناک نتائج بھگتنے ہوں گے ۔ مسٹر بائیڈن سے ہفتے کے روز صحافیوں نے پوچھا کہ امریکہ نے یوکرین میں فوج بھیجنے کے منصوبے کو ترک کرنے کا فیصلہ کیوں کیا اس پر انہوں نے کہا "ایسا کوئی منصوبہ نہیں تھا۔” امریکی صدر نے کہا کہ اگر روس نے یوکرین پر حملہ کرنے کا فیصلہ کیا تو امریکہ ناٹو ممالک میں اپنی فوج کی موجودگی کو بڑھا دے گا اور روس کو اپنے عالمی امیج کے ساتھ ساتھ معیشت کے حوالے سے بھیانک قیمت چکانی پڑے گی۔ مسٹر بائیڈن نے کہا “میں نے صدر پوٹن پر یہ بات بالکل واضح کر دی ہے کہ اگر وہ یوکرین کے ساتھ آگے بڑھتے ہیں تو ان کی معیشت کے لیے نتائج تباہ کن ہوں گے ۔”