چندریان 3بھارت نے تاریخ رقم کردی

چندریان مشن کی کامیابی سے ایک ارب لوگوں کے دل خوشی سے جھوم اٹھے ۔یہ کوئی معمولی بات نہیں کیونکہ اس سے صرف چند روز قبل ہی روس کا خلائی راکٹ چاند پر اترنے میں ناکام ہوا تھا جس کے بعد بھارتی سائینسداں شش و پنج میں پڑ گئے تھے کہ وہ اب کیا کرینگے کیونکہ روس سائینس و ٹیکنالوجی میں بہت آگے بڑھ چکا ہے لیکن چندریان کی کامیابی سے دنیا بھر کو یہ معلوم ہوا کہ ’ہم کسی سے کم نہیں‘دنیا بھر کے ممالک انگشت بدنداں ہوکر رہ گئے جب انہوں نے بھارتی چندریان 3کی کامیاب لینڈنگ کی خبر سنی ۔بھارت کے علاوہ دنیا کے جس کسی ملک میں ہندوستانی باشندے تھے انہوں نے اس موقعے پر جشن منایا اور اسے ملک کی خلائی میدان میں کامیاب چھلانگ سے تعبیر کیا۔وادی کشمیر میں بھی اس موقعے پر جشن کا سا ماحول تھا ۔لال چوک اور دیگر چوکوں میں جو بڑے بڑے سکرین نصب کئے گئے تھے ان کے سامنے ہزاروں لوگ چندریان کے چاند کی سطح پر اُترنے کا براہ راست ٹیلی کاسٹ دیکھ رہے تھے لوگ اس موقعے پر تالیاں بجا بجا کر اپنی خوشی کا اظہار کررہے تھے کیونکہ اس خلائی مشن کی کامیابی نے دنیا بھر کے ممالک کو یہ سوچنے پر مجبور کردیا کہ بھارت اب روس چین اور امریکہ کے ساتھ خلائی دوڑ میں برا بر آگے بڑھ رہا ہے اور کامیابی کی منزلیں طے کررہا ہے ۔اس بارے میں خبر رساں ایجنسیوں نے جو رپورٹیں بھیجی ہیں ان میں کہا گیا کہ ہندوستان نے 23اگست کو ایک نئی تاریخ رقم کردی چندریان 3نے چاند کی سطح پر کامیابی سے سافٹ لینڈنگ کی اور اس کے ساتھ ہی ہندوستان دنیا کا پہلا ایسا ملک بن گیاجس نے چاند کے جنوبی قطب پر رسائی حاصل کی ۔کہا جارہا ہے کہ چاند کے جس حصے پر چندریاں نے لینڈنگ کی اس پر اب تک کسی بھی ملک نے لینڈنگ نہیں کی تھی لیکن بھارت دنیا کا واحد ایسا ملک ہے جو چاند کے جنوبی قطب تک پہنچ گیا ۔اسرو کا چندریان 3جنوبی قطب پر لینڈنگ کرگیا۔امریکہ کے اپولو مشن سمیت دیگر ممالک کے مشن کو چاند کے وسط پر جبکہ چین کا خلائی جہاز قطب شمالی پر اتارا گیا تھا ۔14جولائی کو چندریاں 3آندھرا پردیش کے سری ہری کوٹا میں ستیش دھون خلائی مرکز سے لانچ کیا گیا تھا اور اب بدھ کی شام چھ بجکر چار منٹ پر اس نے چاند پر کامیاب لینڈنگ کی ۔چندریان چاند کا مطالعہ کر ے گا۔چندریان2کی ناکامی کے چار سال بعد اسے لانچ کیا گیا ۔پچھلے مشن کی ناکامیوں کو ذہن میں رکھتے ہوے اس میں خصوصی تبدیلیاں کی گئی تھیں اور اسرو نے پورے اعتماد کے ساتھ اسے لانچ کیا تھا ۔بھارت پہلا ایسا ملک ہے جس نے چاند کے قطب جنوبی پر خلائی جہاز اتارا ۔جس کی بنا پر دنیا بھر کے سائینسدان ہندوستان کے مشن مون پر نظریں جماے ہوے تھے ۔وکرم لینڈر جب چاند کی سطح پر کامیابی کے ساتھ آگے بڑھ رہا تھا تو اس لمحے کا گواہ پورا ہندوستان تو بنا ہی تھا وزیر اعظم نریندر مودی نے بھی جنوبی افریقہ سے براہ راست نشریہ دیکھا اس کے علاوہ بھارتی سائینسداں انہیں پل پل کی خبروں سے آگاہ کرتے رہے تھے ۔بہر حال یہ مشن کامیاب رہا جس سے ہمارے ملک کو کافی حوصلہ ملاہے اور ہر گھر محلے گلی اور ہر جگہ جشن منایا گیا اور اسرو کے سائینسدانوں کو مبارکبادیاں پیش کی جانے لگیں۔