(بجلی کے حوالے سے مرکزی وزیر کی یقین دہانی)

سرمائی ایام میں وادی میںبجلی کی کمی کوئی نئی بات نہیں ۔یوں کہنا زیادہ مناسب رہے گا کہ اکتوبر سے مارچ تک وادی میں بجلی کی صورتحال بحیثیت مجموعی اچھی نہیں رہتی ہے لیکن اس سال ایل جی انتظامیہ کی طرف سے لوگوں کو اس بات کا یقین دلایا گیا کہ وادی میں جاڑوں کے دوران بجلی کی سپلائی پوزیشن بہتر بنانے کی کوشش کی جاے گی اور اسی کے نتیجے میں لیفٹننٹ گورنر نے گذشتہ دنوں نئی دہلی میں قیام کے دوران مرکزی وزیر بجلی کے ساتھ ملاقات کے دوران انہیں سرمائی ایام میں وادی میں بجلی کی کمی اور اس سے پیدا شدہ صورتحال کے بارے میں مکمل جانکاری دی۔لیفٹننٹ گورنر نے وزیر بجلی کو بتایا کہ اگرچہ سرمائی ایام میں ندی نالوں میں پانی کی سطح کم ہوجاتی ہے اور جس کا براہ راست اثر بجلی کی پیداوار پر پڑتا ہے نتیجے کے طور پر وادی میں سرمائی ایام کے دوران لوگوں کو بجلی کے حوالے سے مشکلات کا سامنا کرنا پڑتا ہے چنانچہ اسی کو مدنظر رکھ کر ایل جی نے اس مسلئے کو مرکزی وزیر کے نوٹس میں لانے کا فیصلہ کیا تھا اور گذشتہ دنوں ایل جی وزیر موصوف سے ملے اور انہیں بجلی کے حوالے سے تمام تر تفصیلات فراہم کیں چنانچہ مرکزی وزیر نے ایل جی کو غو ر سے سنا اور ان کو اس بات کا یقین دلایا کہ جموں کشمیر کے لئے سرمائی ایام کے دوران یہ کوشش کی جاے گی کہ زیادہ سے زیادہ بجلی فراہم کی جاسکے تاکہ لوگوں کو کسی قسم کی مشکل پیش نہ آسکے ۔لیفٹننٹ گورنر نے وزیر بجلی کے ساتھ جموں کشمیر میں زیر تکمیل بجلی پروجیکٹوں کے بارے میں بھی بات چیت کی اور انہیں بجلی کے بنیادی ڈھانچے کو بہتر بنانے کے لئے اقدامات اٹھانے کی مانگ کی جس پر مرکزی وزیر نے ایل جی کو اس بات کا یقین دلایا کہ مرکزی حکومت جموں کشمیر کی تیز تر ترقی کے لئے کوئی دقیقہ فروگذاشت نہیں کرے گی۔سرمائی ایام میں بجلی کی قلت کوئی نئی بات نہیں لیکن گذرے ہوے کل میں بجلی کی اتنی زیادہ ضرورت نہیں پڑتی تھی جتنی آج پڑتی ہے ۔آج قدم قدم پر بجلی سے کام لیا جاتا ۔کیونکہ دستکاری صنعتیں اب آہستہ آہستہ دم توڑ رہی ہیں ہتھ کرگے ماضی کی داستان بن گئے ہیں ۔ا ب سب کچھ بجلی پر چلتا ہے اسلئے بجلی کی ضرورت بھی بڑھتی جارہی ہے۔خاص طور پر طلبہ کے لئے تو بجلی کی ضرورت حد سے زیادہ محسوس کی جارہی ہے ۔نئی تعلیمی قومی پالیسی کا جہاں تک تعلق ہے تو اس کی وجہ سے اب سالانہ امتحانات جو پہلے نومبر میں لئے جاتے تھے اب ان امتحانات کے لئے مارچ سیشن مقرر کیا گیا ہے اسلئے پہلی کلاس سے لے کر یونیورسٹی سطح کے کلاسز میں زیر تعلیم طلبہ کے لئے سردیوں کے ایام اس وجہ سے راحت بن کر آے کہ وہ ان مہینوں میں امتحانات کے لئے تیاریاں کرسکیں۔اسلئے بجلی کی فراہمی میں خلل سے ان کی پڑھائی بھی متاثر ہوسکتی ہے ۔اسلئے ایل جی نے بجلی کے حوالے سے موثر قدم اٹھایا اور معاملہ مرکزی وزیر کی نوٹس میں لایا جس نے منوج سنہا کو اس بات کا یقین دلایا کہ سرمائی ایام میں جموں کشمیر کے لئے بجلی کی سپلائی میں اضافہ کیاجاے گا۔