(سرکاری دفاتر میں ورک کلچر کو فروغ دینے کا معاملہ )

حکومت جموں کشمیر نے سرکاری ملازمین کے لئے ورک کلچر کو فروغ دینے اور ایڈمنسٹریشن میں کورپشن کے خاتمے کے لئے جو اقدامات شروع کئے ہیں ان کے مثبت نتایج اب ظاہر ہونے لگے ہیں ان اقدامات کا نہ صرف عوامی حلقوں کی طرف سے خیر مقدم کیاجارہا ہے بلکہ خود شفاف کردار کے مالک سرکاری ملازمین اور افسر بھی سرکاری اقدامات پر خوش نظر آرہے ہیں کیونکہ سرکاری ملازمین کی ایک قلیل تعداد جو رشوت خور ہے اور جو کام کاج نہیں کرتے ہیں وہ اس وقت پریشان نظر آرہے ہیںکیونکہ ورک کلچر سے ان کو نفرت ہے وہ صرف بالائی آمدن میں یقین رکھتے ہیں چنانچہ سرکار نے حالیہ احکامات کے ذریعے ملازمین کو متنبہ کیا ہے کہ وہ کسی بھی صورت میں سرکاری کام کاج کی انجام دہی کے دوران تساہل پسندی کا مظاہرہ نہ کریں اور نہ ہی رشوت ستانی میں خود کو کسی بھی طور ملوث کریںاور اگر وہ ایسا کرینگے تو انہیں Deadwoodقرار دے کر ملازمت سے برطرف کیا جاسکتا ہے ۔اس کے علاوہ سرکاری دفاتر میں ملازمین اور افسروں کی حاضری یقینی بنانے کے لئے بائیو میٹرک حاضری لازمی قرار دی گئی جس کا نتیجہ یہ نکلا کہ اب سرکاری ملازمین دفاتر میں بروقت حاضر ہوتے ہیں اور مقررہ وقت پر دفاتر سے واپس نکلتے ہیں اس سے ان میں ایمانداری سے فرایض کی انجام دہی کا جذبہ موجزن ہورہا ہے اور انہیں لوگوں کی خدمت کرنے کا جذبہ روز بروز بڑھتا جارہا ہے ۔اب سایل کو کسی بھی فایل کو ایک جگہ سے دوسری جگہ تک لانے اور لے جانے کے لئے ’چائے‘ نہیں دینا پڑتی ہے وقت پر لوگوں کے کام انجام دئے جانے لگے ہیں۔لوگ اس اقدام سے کافی خوش نظر آرہے ہیں۔اب حال ہی میں جنرل ایڈمنسٹریشن محکمے کی طرف سے سرکاری ملازمین اور افسروں کے نام ایک ہدایت نامہ جاری کردیا گیا ہے جس میں سرکاری ملازمین اور افسروں کو iGOTکرما یوگی پورٹل پر خود کو رجسٹر کرنے کا حکم دیا گیا ہے سرکاری ذرایع کا کہنا ہے حکومت ہند نے قومی پروگرام براے سول سروسز کی صلاحیت سازی مشن کرما یوگی شروع کیا ہے جس کا مقصد حکومت میں صلاحیت سازی اور ایچ آر منیجمنٹ ڈھانچے پر توجہ مرکوز کرتے ہوے افسروں اور تربیتی اداروں کی صلاحیت بشمول ریگو لیشن اور گورننس کو فروغ دینا ہے ۔سرکاری طور پر اس بارے میں جو سرکیولر جاری کردیا گیا اس میں بتایا گیا کہ پروگرام تمام محکموں ،تنظیموں اور ایجنسیوں کے تمام سرکاری ملازمین کا احاطہ کرنے کیلئے بنایا گیا ہے تاکہ موثر اور بہترین عوامی خدمات کی فراہمی کے لئے ان کی قابلیت کو بڑھایا جاسکے ۔سرکاری حکمنامے میں مزید کہا گیا ہے کہ اس پلیٹ فارم نے عہدیداروں کو اپنی قابلیت ،اہلیت کو دریافت کرنے ،اسے حاصل کرنے اور تصدیق کرنے کے قابل بنایا جو ان کے فرایض کی انجام دہی کے لئے انتہائی اہم ہیں۔حکومت نے کہا کہ تمام ملازمین کو صلاحیت سازی کے اس اقدام سے فایدہ اٹھانا چاہئے تاکہ لوگوں کو سرکاری دفاتر میں کسی بھی کام کے لئے کلرکوں یا افسروں کے سامنے منت سماجت نہ کرناپڑے ۔یہی وجہ ہے کہ عام لوگ سرکاری اقدامات کی سراہنا کرتے ہیں ۔