الیکشن کمیشن کو فی الحال شیو سینا پر فیصلہ نہیں کرنا چاہئے : سپریم کورٹ

نئی دہلی، ۴اگست (یو این آئی) سپریم کورٹ نے جمعرات کو الیکشن کمیشن سے کہا کہ وہ مہاراشٹر کے وزیر اعلی ایکناتھ شنڈے کی درخواست پر غور نہ کرے جس میں یہ دعوی کیا گیا ہے کہ ان کا گروپ حقیقی شیوسینا کی نمائندگی کرتا ہے ۔چیف جسٹس جسٹس این۔ وی رمنا اور جسٹس کرشنا مراری اور جسٹس ہیما کوہلی کی بنچ نے اپنے زبانی حکم میں سابق وزیر اعلیٰ ادھو ٹھاکرے کیمپ کو راحت دیتے ہوئے الیکشن کمیشن آف انڈیا سے کہا کہ وہ شنڈے گروپ کی شناخت کے دعوے پر کوئی ابتدائی کارروائی نہ کرنے کو کہا ہے ۔شنڈے دھڑے نے برہن ممبئی میونسپل کارپوریشن (بی ایم سی) انتخابات سے قبل حقیقی شیوسینا کے طور پر اپنی شناخت کے لیے الیکشن کمیشن سے رجوع کیا تھا۔ٹھاکرے کیمپ کی جانب سے سپریم کورٹ میں درخواست دائر کی گئی تھی جس میں الیکشن کمیشن کی کارروائی پر فوری روک لگانے کی درخواست کی گئی تھی۔سپریم کورٹ نے ٹھاکرے گروپ کی عرضی پر غور کرنے کے بعد الیکشن کمیشن سے کہا کہ اگر ٹھاکرے گروپ شنڈے دھڑے کی عرضی پر اپنے نوٹس کا جواب داخل کرنے کے لیے وقت مانگتا ہے تو اسے ان خیالات کو مدنظر رکھنا ہوگا۔ عدالت اس تناظر میں ان کی درخواست پر غور کرے ۔جسٹس رمنا کی سربراہی میں تین ججوں کی بنچ نے کہا کہ وہ پیر تک فیصلہ کرے گی کہ آیا مہاراشٹر میں شنڈے گروپ کی بغاوت اور اس کے نتیجے میں ہونے والی پیش رفت سے متعلق آئینی اہمیت کے سوالات کو بڑی بنچ کے پاس بھیجنا ہے ۔