کار کی سیٹوں پر ایئر بیگز لگانے کی تیاری

اگلی سیٹوں پر لازمی قرار، پچھلی سیٹوں پر بھی لگانے پر غور :گڈکری
نئی دہلی، ۴اگست (یو این آئی) حکومت نے کہا ہے کہ ملک میں سڑک حادثات کے بڑھتے ہوئے واقعات پر قابو پانے کیلئے کاروں کی اگلی سیٹوں پر ایئر بیگ کو لازمی قرار دینے کے بعد اب وہ اسے پچھلی سیٹوں پر بھی لگانے پر غور کر رہی ہے ۔ لوک سبھا میں روڈ ٹرانسپورٹ اور ہائی ویز کے وزیر نتن گڈکری نے ایک ضمنی سوال کے جواب میں کہا کہ کاروں پر ایئر بیگ کو لازمی قرار دیا گیا ہے ۔ یہ قدم پچھلی سیٹوں پر بیٹھے لوگوں کی حفاظت کو مدنظر رکھتے ہوئے اٹھایا جا رہا ہے ۔ انہوں نے کہا کہ ہماری کوشش ہے کہ گاڑی میں بیٹھے تمام لوگوں کو گاڑی میں ایئر بیگ کی طرح سیکیورٹی فراہم کی جائے ، حکومت اس سمت میں قدم اٹھا رہی ہے ۔ انہوں نے کہا کہ یہ درست ہے کہ الیکٹرک گاڑیوں کی تعداد میں مسلسل اضافہ ہو رہا ہے اور توجہ الیکٹرک گاڑیوں کی تعداد بڑھانے پر ہے تاکہ ڈیزل پٹرول پر درآمدی انحصار کم ہو اور عوام کو سستے نرخوں پر ایندھن دستیاب ہو سکے ۔ اس سے وہاں پیدا ہونے والی آلودگی میں کمی آئے گی، اس پر قابو پایا جا سکے گا، حکومت جلد ہی 50 ہزار الیکٹرک بسیں لانے کا منصوبہ بنا رہی ہے ۔