طلباءاور نوجوانوں نے ترال میں ’ ہر گھر ترنگامہم ‘ میں حصہ لیا

کمشنر سیکرٹری آر ڈی ڈی نے تقریب میں شرکت کی
ہزاروں نوجوانوں اور طلباءنے’آزادی کا اَمرت مہااُتسو ‘کے تحت ’ ہر گھر ترنگا مہم ‘کے جوش و خروش اور فیسٹولوں کو جاری رکھتے ہوئے آزادی کے 75 سال کاجشن مناتے ہوئے ترال پلوامہ میں قومی پرچموں کی نمائش اور حب الوطنی کے گیت گاتے ہوئے ایک عظیم الشان تقریب میں شرکت کی۔اِس تقریب کا اِنعقاد ضلع اِنتظامیہ پلوامہ نے ضلع ترقیاتی کمشنر پلوامہ بصیر الحق چودھری کی قیادت میں ایس ایس پی اونتی پورہ کے ساتھ کیا ہے۔تقریب میں زائد اَز 15,000 سکولی بچوں اور نوجوانوں نے شرکت کی اور حب الوطنی کے گیت گائے۔اِس تقریب میں کمشنر سیکرٹری آر ڈی ڈی مندیپ کور نے شرکت کی۔ اُنہوں نے اِجتماع سے خطاب کرتے ہوئے کہا کہ اِس اَقدام کا مقصد لوگوں میں ملکیت کا احساس پیدا کرنا اور’ آزادی کا اَمرت مہا اُتسو‘ کو جن بھاگیداری ( کمیونٹی کی شرکت ) کے جذبے سے منانا ہے۔اُنہوں نے کہا کہ اِس مہم کا مقصد شہریوں کو 13سے 15 اگست کے درمیان اَپنے گھروں میں قومی پرچم لہرانا ہے ۔ اُنہوں نے مزید کہا کہ جدو جہد آزادی سے جُڑے مختلف مقامات پر مختلف تقاریب کا اِنعقاد کیا جائے گا جس میں زندگی کے تمام شعبوں سے تعلق رکھنے والے اَفراد شامل ہوں گے۔ضلع ترقیاتی کمشنر پلوامہ بصیر الحق چودھری نے کہا کہ ’ ہر گھر ترنگا‘ کی سرگرمیوں کامقصد لوگوں کے دِلوں میں حب الوطنی کے جذبات کو اُبھارنا اور ہندوستانی قومی پرچم کے بارے میں بیداری کو فروغ دینا ہے۔اُنہوں نے مہم کو ایک عوامی تحریک بنانے کے لئے نوجوانوں اور عوام الناس کے کردار کو سراہا۔ اُنہوں نے کہا کہ اِس کو کامیاب بنانے میں نوجوانوں اور طلباءکی بھرپور شرکت ضروری ہے ۔ اُنہوں نے جدوجہد آزادی کے نظریات اور نوجوانوں پر زور دیا کہ وہ ان نظریات کی پاسداری کرکے ان پر عمل کریں۔اُنہوں نے کہا کہ مہم کو فروغ دینے کے لئے ضلع بھر میں ریلیاں ، مباحثے ، کوئز ، مصوری مقابلے اور ثقافتی پروگراموں کا سلسلہ جاری ہے ۔ اُنہوں نے کہا کہ نوجوانوں کی بھرپور شرکت نے مہم کو ضلع بھر میں کامیاب بنایا ہے۔