(جموں کشمیر فصل بیمہ یوجنا کا اطلاق)

جموں کشمیر کے تمام اضلاع یعنی سب کے سب بیس اضلاع میں وزیر اعظم فصل بیمہ یوجنا کے نفاذ کا اعلان کردیاگیا ۔سرکاری طور پر بتایا گیا کہ اس بیمہ کے لاگو ہونے سے کسانوں کو موسمی بے رخی سے ہورہے نقصان کی بھر پور انداز میں بھر پائی ہوگی۔لیفٹننٹ گورنر منوج سنہا نے اس کا اعلان کرتے ہوے کہا کہ یہ سکیم قدرتی آفات اور غیر موسمی بارشوں سے پیدا ہونے والے فصلوں کے نقصانات کے خلاف جامع کوریج فراہم کرے گی۔انہوں نے کہا کہ اس یوجنا سے کسانوں کی آمدن کو استحکام حاصل ہوسکتا ہے ۔موسمیاتی تباہی سے کافی انشورنس تحفظ کے ساتھ اختراعی طریقوں کو اپنانے کی ترغیب دے گا ۔انہوں نے کسانوں سے اپیل کی کہ وہ اس سکیم سے فایدہ اٹھائیں اور موسمی حالات کیسے بھی ہوں اس سکیم کے دائیرے میں آنے والے کسانوں کو کسی قسم کی پریشانی میں پڑنے کا کوئی امکان نہیں ۔اس سکیم کا آغاز وزیر اعظم نے محنتی کسانوں کو فطرت کی خرابیوں سے بچانے کیلئے کیا تھا اس سے قبل کسانوں کو صرف چار اضلاع کے لئے ہی یہ سکیم رایج تھی ۔ایل جی نے بتایا کہ جموں کشمیر میں فصل بیمہ یوجنا کے نفاذ سے جموں کشمیر کے زرعی منظر نامے پر مثبت اثرات پڑ سکتے ہیں۔اس سکیم کی خصوصیت یہ ہے کہ فصل انشورنس ،موبایل ایپ ،انشورنس کمپنی کا ٹول فری نمبر کسانوں کو نقصانات کی اطلاع دینے میں سہولیات فراہم کرسکتا ہے ۔ کسانوں کی فلاح و بہبود سرکار کی اولین ترجیح ہے انتظامیہ نے زراعت ،باغبانی اور اس سے منسلک شعبوں میں جامع ترقی کے ویثرن کو تشکیل دینے کے لئے بڑے فیصلے لئے ہیں منوج سنہا نے اعلان کیا کہ زراعت اور اس کے مختلف شعبوں کی ہمہ گیر ترقی کے لئے 5013کروڑ روپے کے 29پر وجیکٹس زراعت اور اس سے منسلک شعبوں سے متعلق تمام شعبوں کا یک مربوط حل فراہم کرینگے ۔جس سے وقت کا ضیاع کم ہوگا اور پیداوار میں بھی اضافہ ہوگا۔اس کے ساتھ ہی سرکار کا کہنا ہے کہ اس کی کوشش یہی رہے گی زراعت کے شعبے میں بڑے پیمانے پر روز گار کے مواقع پیدا کئے جائیں۔چھوٹے اور معاشی طور پر پسماندہ کسانوں کے لئے معاشی نظام کو مستحکم بنایا جاے گا۔نئے اور بڑے زرعی کاروباری اداروں کیلئے قیام کے لئے سہولیات کو یقینی بنایا جاے گا۔ایل جی نے آخر پر کہا کہ ہم اپنی کسان برادری اور زراعت اور اس سے منسلک دیگر شعبوں سے وابستہ سٹاک ہولڈرز کی زندگیوں میں خوشحالی کو لانے کیلئے پختہ عزم کے ساتھ آگے بڑھ رہے ہیں۔یہ امر قابل ذکر ہے کہ آبادی بڑھنے کے ساتھ ساتھ زرعی پیداوار کو بڑھانے کے لئے حکومت ہر سال اقدامات اٹھارہی ہے لیکن موسم کی بے رخی سے فیصلیں تباہ ہوجاتی ہیں جس کو مدنظر رکھ کر وزیر اعظم نے جموں کشمیر میں کسانوں کی مالی حالت کو استحکام بخشنے کے لئے بیمہ یوجنا لاگو کی جس کو مثبت فیصلہ قرار دیا جاے گا۔