دہلی میں فضائی آلودگی خطرناک سطح پر

آلودگی کی سطح بڑھنے سے لوگوں کو سانس لینے میں دشواری کا سامنا
نئی دہلی، یکم نومبر (یو این آئی) دارالحکومت دہلی اور قومی راجدھانی خطہ (این سی آر) میں منگل کو فضائی آلودگی کی سطح انتہائی خراب ریکارڈ کی گئی۔ ایئر کوالٹی انڈیکس (اے کیو آئی) کے مطابق، آج صبح 8.30 بجے دہلی میں فضائی آلودگی کی صورتحال انتہائی سنگین رہی۔ کئی علاقوں میں ہوا کے معیار کی سطح 400 ریکارڈ کی گئی۔ وہیں نریلا میں اے کیو آئی 571 کی خطرناک سطح ریکارڈ کی گئی ہے ۔ آئی ٹی او پر اے کیو آئی 441، راج پتھ پر 417 اور مندر مارگ میں 352 تھا۔ دریں اثنا، فصل کی کٹائی کے بعد پرالی جلانے کے معاملات میں اضافہ فضائی آلودگی کی سطح کو بڑھا سکتا ہے ۔ آلودگی کی سطح بڑھنے سے لوگوں کو سانس لینے میں دشواری کا سامنا ہے ۔ دہلی اور این سی آر میں تین دنوں سے اسموگ اور دھند کی ایک تہہ نظر آرہی ہے اور فی الحال راحت کی کوئی امید نظر نہیں آرہی ہے ۔دریں اثناءبھارتیہ جنتا پارٹی نے دہلی اور قومی راجدھانی خطہ میں زہریلی دھند کےلئے آج عام آدمی پارٹی (اے اے پی) کی پنجاب حکومت اوروزیراعلیٰ اروند کیجریوال کو ذمہ دار ٹھہراتے ہوئے کہا کہ یہ مسٹر کیجریوال کی مجرمانہ لاپرواہی کا نتیجہ ہے ۔ بی جے پی کے ترجمان گورو بھاٹیہ نے یہاں پارٹی ہیڈکوارٹر میں منعقدہ ایک پریس کانفرنس میں کہا، “آج دہلی اور پنجاب کے لوگ کہہ رہے ہیں کہ دہلی اور پنجاب کی ہواوں میں زہرہے ، شرم کرواروند کیجریوال، یہ تمہارے نکمے پن کا قہرہے ۔ مسٹر بھاٹیہ نے کہا کہ آج دہلی کے ساتھ ساتھ پنجاب میں بھی مسٹر کیجریوال کی پارٹی کی حکومت ہے اور دونوں حکومتوں کی طرف سے مجرمانہ غفلت ناقابل معافی ہے ۔ مسٹر کیجریوال اور پنجاب کے وزیر اعلی بھگونت مان کو فوری طور پر استعفیٰ دینا چاہئے ۔