سری لنکا میں 37 نئے وزرائے مملکت کی حلف برداری

ڈرگ کی تلاش میں اسکول بیگ کی تلاشی لی جائے گی: وزیر تعلیم
کولمبو، 8 ستمبر (یو این آئی) سری لنکا کے صدر رانیل وکرما سنگھے نے جمعرات کے روز 37 نئے وزرائے مملکت کو عہدے کا حلف دلایا۔ صدارتی دفتر نے ایک بیان میں کہا کہ وزرائے مملکت نے دارالحکومت کولمبو میں صدر کے ہاتھوں حلف لیا۔ حلف لینے والوں میں شیہان سیماسنگھے نے وزیر مملکت برائے خزانہ، پرمیتا بندارا ٹیناکون نے وزیر مملکت برائے دفاع اور تھرکا بالسوریا نے وزیر مملکت برائے امور خارجہ کے طور پر حلف لیا۔ سرکاری حکام نے بتایا کہ تمام نئے وزراءجلد ہی چارج سنبھالیں گے ۔ دریں اثناءسری لنکا کے بحریہ کے اہلکار تربیت کے بعد امریکہ سے وطن واپس آنے والے تھے لیکن وہ سب لاپتہ ہو گئے ہیں۔ سری لنکا بحریہ کا جہاز پی627 گزشتہ ہفتے امریکہ کے سیئٹل سے بغیر بحری اہلکار کے روانہ ہوا جو "اس طرح کے واقعہ کو روکنے کے لیے سخت اقدامات کے باوجود” غائب ہوگئے ۔ دریں اثناءسری لنکائی حکومت نے کہا ہے کہ اسکول میں طلباءکے تھیلوں کی تلاشی لی جائے گی تاکہ یہ یقینی بنایا جا سکے کہ ان میں کوئی نشہ آور چیز نہیں ہے ۔ سری لنکا کے ایک روزنامہ نے وزیر تعلیم سشیل پریم جیانت کے حوالے سے یہ اطلاع دی ہے ۔ وزیر نے یہ بات کل پارلیمنٹ میں کہی۔ مسٹر پریم جینت نے کہا کہ اسکول کے حکام کو جلد ہی ایک سرکلر جاری کیا جائے گا تاکہ طلبہ کے اسکول بیگز کی تلاشی لی جائے تاکہ یہ معلوم کیا جاسکے کہ آیا وہ کرسٹل میتھامفیٹامین جیسی غیر قانونی منشیات لے کر تو نہیں آئے ہیں۔ کرسٹل میتھامفیٹامین آئی سی ای کے طور پر جانا جاتا ہے ۔ وزیر نے کہاکہ "اسکول کے بچوں میں منشیات کو فروغ دینے کے بہت جدید اور خطرناک طریقے اپنائے جا رہے ہیں۔ اس لعنت کو روکنے کے لیے کوئی مناسب طریقہ کار نہیں ہے ۔ والدین، سرپرستوں اور اسکول حکام کو ملک کے بچوں کو منشیات کی لعنت سے بچانے کے لیے آگے آنا چاہیے ۔”