بھارت میں روایتی کاشتکاری کو مربوط کرنا بھی ہمارا مقصد ہے۔  شیوراج سنگھ چوہان

 نئی دہلی/زراعت اور کسانوں کی بہبود اور دیہی ترقیات کے مرکزی وزیر جناب شیوراج سنگھ چوہان نے آج نئی دہلی کے ڈاکٹر سی سبرامنیم آڈیٹوریم، این اے ایس سی کمپلیکس، پوسا میں زرعی یونیورسٹیوں کے وائس چانسلروں اورآئی سی اے آر اداروں کے ڈائریکٹروں کی سالانہ کانفرنس کا افتتاح کیا۔ اپنے خطاب میں مرکزی وزیر نے اس بات پر زور دیا کہ انڈین کونسل آف ایگریکلچرل ریسرچ (آئی سی اے آر) کی جب تحقیق اور توسیع کی بات آتی ہے تو یہ ملک کا فخر ہے۔ انہوں نے زور دے کر کہا کہ ‘‘وکِست بھارت’’ کے ویژن کے ہدف کو حاصل کرنے کے لیے زراعت کو آگے بڑھانا اور کسانوں کو بااختیار بنانا ہوگا۔ کسانوں کو ایشورکے برابر قرار دینا، جو دنیا کی پرورش کرتے ہیں۔ انہوں نے کہا کہ وہ واقعی ہمارے احترام اور تعظیم کے مستحق ہیں۔ انہوں نے مزید کہا کہ ان کی فلاح و بہبود کو یقینی بنانا اور ان کے ذریعہ معاش کو محفوظ بنانا ہماری ذمہ داری ہے۔جناب چوہان نے وائس چانسلروں پر زور دیا کہ وہ اپنی تعلیمی ذمہ داریوں کے ساتھ ‘وکست کرشی سنکلپ ابھیان’ میں بڑھ چڑھ کر حصہ لیں۔ انہوں نے اس بات پر زور دیا کہ ‘‘لیب ٹو لینڈ’’ اقدام کا حقیقی وقت میں نفاذ وقت کی ضرورت ہے۔ ترقی یافتہ ہندوستان کے اہداف کو حاصل کرنے کے لئے وزارت زراعت اور کسانوں کی بہبود کی چھ نکاتی حکمت عملی کا خاکہ پیش کرتے ہوئے، وزیر موصوف نے پیداوار میں اضافہ، پیداواری لاگت کو کم کرنا، پیداوار کی مناسب قیمتوں کو یقینی بنانا، قدرتی آفات سے ہونے والے نقصانات کی تلافی، زرعی تنوع کو فروغ دینا، اور قیمتوں میں اضافہ اور فوڈ پروسیسنگ کو بڑھانے پر زور دیا ۔ انہوں نے قدرتی اور نامیاتی کاشتکاری کے طریقوں کو فروغ دینے کی ضرورت پر بھی زور دیا۔وزیر موصوف  نے مزید کہا کہ زرعی تنوع اور مادر دھرتی کی حفاظت ہماری سب سے بڑی اجتماعی ذمہ داریوں میں شامل ہے۔ انہوں نے اس بات کا اعادہ کیا کہ سائنس پر مبنی زرعی تبدیلی وزارت کی بنیادی توجہ ہے، جبکہ روایتی زرعی طریقوں کو بھی مربوط کرنا ہے۔ انہوں نے کہا کہ ‘وکست کرشی سنکلپ ابھیان’ زراعت کے شعبے میں ایک تاریخی پہل ہے، جو کسانوں کو بااختیار بنانے، ان کی روزی روٹی کو بہتر بنانے اور نچلی سطح پر ان کے مسائل کا براہ راست حل فراہم کرنے کے لیے وقف ہے۔ انہوں نے اعلان کیا کہ وہ 25-26 مئی کو کسانوں سے براہ راست رابطہ قائم کرنے اور ان کے مسائل کے بارے میں خود کو سمجھنے کے لیے ایک پد یاترا (پیدل مارچ) کریں گے۔ جناب چوہان نے اس بات پر زور دیا کہ ہندوستان کے اہداف میں غذائی تحفظ کو یقینی بنانا، قومی اناج کے ذخائر کو بھرنا اور ہندوستان کو دنیا کی اجناس کے ذخائر میں تبدیل کرنا شامل ہے۔ ‘‘ہم ایک ٹیم ہیں’’، انہوں نے کہا-‘‘اور ہمارا منتر  ون نیشن،  ون  اگریکلچر، ون ٹیم ہے۔’’