شمالی ہند میں ٹھنڈ اور کہرے کی شدت جاری

محکمہ موسمیات نے اگلے تین دنوں کیلئے یلو الرٹ جاری کیا ہے
نئی دہلی/شمالی ہند کی کئی ریاستوں میں شدید ٹھنڈ اور کہرے کی وجہ سے عام زندگی متاثر ہوکر رہ گئی۔ راجدھانی دہلی میں اگلے دن بھی زیادہ تر مقامات پر دھند اور درمیانی سطح کا کہرا رہنے کا امکان ہے۔ کہیں کہیں گھنا کہرا بھی ہو سکتا ہے۔ شام اور رات کے وقت بھی یہی حالت رہے گی۔ کئی مقامات پر کولڈ ڈے والے حالات بھی بنے رہ سکتے ہیں جس کے سبب محکمہ موسمیات نے اگلے تین دنوں کے لیے یلو الرٹ جاری کیا ہے۔ زیادہ سے زیادہ اور کم سے کم درجہ حرارت بالترتیب 16 اور 8 ڈگری رہنے کا امکان ہے۔ برفیلی ہواوں کی وجہ سے راجدھانی میں ٹھٹھرن بھری ٹھنڈ کا سلسلہ برقرار ہے۔ حالانکہ شدید کہرا دیکھنے کو نہیں مل رہا ہے۔ حد نگاہ میں بھی پہلے کے مقابلے میں تھوڑی بہتری آئی ہے۔ تیز ہوا کے اثر سے دہلی کے ہوا کے معیار میں بہتری آئی۔ مرکزی آلودگی کنٹرول بورڈ (سی پی سی بی) کے مطابق دہلی کا اے کیو آئی 296 یعنی ’خراب‘زمرے میں رہا۔ سوموار کو یہ 335 رہا تھا۔ بتایا جاتا ہے کہ ابھی اگلے دو دنوں تک اے کیو آئی اسی زمرے میں رہے گا۔ اس کے بعد پھر سے ‘انتہائی خراب’ زمرے میں پہنچ جائے گا۔ این سی آر کے شہروں کے ہوا کے معیار میں بھی اس وقت کچھ کمی درج کی گئی ہے۔