جموں و کشمیر میں تمام امتحانات وقت پر ہوں گے: وزیرتعلیم سکینہ ایتو

 سری نگر : : وزیر تعلیم سکینہ ایتو نے جمعرات کو کہا کہ جموں و کشمیر میں تمام امتحانات وقت پر اور تعلیمی کیلنڈر کے مطابق ہوں گے۔انہوں نے یہ بھی کہا کہ حکومت طلبائ کو درپیش تعلیمی نقصان کی تلافی کے لیے تمام اسٹیک ہولڈرز سے تجاویز طلب کر رہی ہے۔جے کے این ایس کے مطابق صحافیوں سے بات کرتے ہوئے اسکولی تعلیم اورصحت وطبی تعلیم کی وزیرسکینہ ایتو نے کہا کہ جموں و کشمیر میں شروع میں جنگ جیسی صورتحال، گرمی کی لہر اور پھر سیلاب جیسی صورتحال کی وجہ سے طلبہ کی پڑھائی بری طرح متاثر ہوئی۔انہوں نے یہ بھی کہا کہ دونوں خطوں میں کچھ اسکول حالیہ سیلاب اور قدرتی آفات سے متاثر ہوئے اور نقصان پہنچا۔ لیکن جہاں تک امتحانات کا تعلق ہے، میں یہ واضح کرنا چاہتی ہوں کہ تمام امتحانات وقت پر ہوں گے ۔انہوں نے مزید کہا کہ محکمہ تعلیم اس سال مختلف حالات کی وجہ سے طلبہ کو درپیش تعلیمی نقصان کی تلافی کے لیے تمام اسٹیک ہولڈرز سے تجاویز طلب کر رہا ہے۔ وزیر تعلیم سکینہ ایتو نے مزید کہا کہ پچھلے سال ہم نے مارچ سے نومبر سے دسمبر تک تعلیمی سیشن کو تبدیل کیا، یہ ایک بڑا چیلنج تھا اور اب ہم نے اسے کافی حد تک ہموار کر دیا ہے۔