جموں وکشمیرمیںسیلاب کے بعد کامنظر نامہ،وزیراعلیٰ نے لیا اعلیٰ سطحی میٹنگ میں جائزہ

بحالی اقدامات پراولین توجہ دینے کا فیصلہ
 حساس مقامات کو مزید تقویت دیں، سیلاب زدہ دیہاتوں میں انخلاءکی مہم جاری رکھیں
24 گھنٹے نگرانی، متاثرہ علاقوں کا بار بار دورہ اور رہائشیوں کو الرٹ رکھیں:عمرعبداللہ کی ہدایت
سری نگر:۵،ستمبر/ وزیراعلیٰ عمرعبداللہ نے جمعہ کی صبح سیلاب کے بعد کے منظر نامے پر ایک میٹنگ کی صدارت کی۔انہوںنے حساس مقامات کو مزید تقویت دینے، سیلاب زدہ دیہاتوں سے لوگوں کو نکالنے، کنٹرول رومز کے ذریعے24 گھنٹے نگرانی اور متاثرہ علاقوں کا بار بار دورہ کرنے اور رہائشیوں سے الرٹ رہنے، خوف و ہراس سے بچنے اور انتظامیہ کے ساتھ تعاون کرنے کی ہدایت کی۔جے کے این ایس کے مطابق وزیراعلیٰ عمرعبداللہ نے جمعہ کی صبح سیلاب کے بعد کے منظر نامے پر ایک میٹنگ کی صدارت کی۔میٹنگ میں نائب وزیراعلیٰ سریندرچودھری ،وزیر تعلیم وصحت سکینہ ایتو ،وزیر جاوید رانا،وزیراعلیٰ کے مشیر ناصراسلم وانی ،چیف سیکرٹری اتل ڈولو،مختلف محکموںکے سیکرٹریوں،این ڈی آرایف وایس ڈی آر ایف کے حکام اور دیگر کئی سینئر افسروںنے بھی شرکت کی ۔میٹنگ کے دوران ویڈیوکانفرنسنگ کے ذریعے سیلاب زدہ اضلاع کے اعلیٰ حکام سے بھی تازہ صورتحال کے بارے میں جانکاری حاصل کی گئی ۔مختلف اضلاع کے ڈپٹی کمشنروں اوردوسرے حکام نے اپنے اپنے اضلاع کے سیلاب زدہ ،زیر آب یا پُرخطر علاقوںکی تازہ صورتحال کے بارے میں آگاہی فراہم کی ۔میٹنگ میں موجود حکام نے وزیر اعلیٰ کو سیلاب سے بچاﺅ اورسیلاب زدہ علاقوں میں فوری بچاﺅ اورامدادی کا رروائیوںکے بارے میں جانکاری فراہم کی ،اورساتھ ہی بتایاکہ دریائے جہلم کے پانی کو مزید علاقوںمیں داخل ہونے سے روکنے کیلئے محکمہ آبپاشی وفلڈ کنٹرول نے پولیس ودیگرایجنسیوں کے اشتراک سے کیاکچھ فوری نوعیت کے اقدامات اُٹھائے ۔حکام نے میٹنگ کے دوران بتایاکہ سری نگر ،بڈگام ،پلوامہ ،کولگام اور اننت ناگ کے سیلاب زدہ اور زیرآب علاقوںمیں جانی نقصان سے بچنے کیلئے پولیس ،دریائی پولیس ،این ڈی آر ایف اورایس ڈی آر ایف کے علاوہ دیگرایجنسیوںنے بھی ہزاروں لوگوںکو محفوظ مقامات پر منتقل کیاجہاں اُنھیں فوری ضرورت کا سامان بھی فراہم کیاجارہاہے ۔حکام نے بتایاکہ سیلاب زدہ اور دیگرزیرآب علاقوں سے لوگوںکے محفوظ انخلاءکو یقینی بنانے کیلئے متعدد ٹیمیں سرگرم عمل رہیں ،اور ابھی بھی کچھ علاقوںمیں ایسی بچاﺅ کارروائیاں جاری رکھی گئی ہیں ۔چیف منسٹر آفس ، جموں و کشمیرکی جانب سے اعلیٰ سطحی میٹنگ کی تصاویر ایکس پر شیئر کرتے ہوئے بتایاگیاکہ وزیراعلیٰ عمرعبداللہ نے حساس مقامات کو مزید تقویت دینے، سیلاب زدہ دیہاتوں سے لوگوں کو نکالنے، کنٹرول رومز کے ذریعے24 گھنٹے نگرانی اور متاثرہ علاقوں کا بار بار دورہ کرنے اور رہائشیوں سے الرٹ رہنے، خوف و ہراس سے بچنے اور انتظامیہ کے ساتھ تعاون کرنے کی ہدایت کی۔انہوں نے بجلی، پانی کی فراہمی اور سڑک کے رابطے سمیت ضروری خدمات کی تیزی سے بحالی پر بھی زور دیا۔