چیولگام کولگام میں جنگجوﺅں اور سیکورٹی فورسز کے مابین مسلح تصادم آرائی

ایک جنگجو جا ں بحق ، علاقے میں وسیع پیمانے پر آپریشن جاری/ پولیس
سرینگر/11نومبر/// جنوبی ضلع کولگام کے چیولگام علاقے میں فوج و فورسز اور جنگجوﺅں کے مابین مسلح تصادم آرائی میں ایک جنگجو جا ں بحق ہو گیا ہے۔ پولیس نے جھڑپ میں جنگجو کی ہلاکت کی تصدیق کرتے ہوئے بتایا کہ علاقے میں آپریشن جاری ہے ۔ کوگام کے چیولگام علاقے میں دو جنگجوﺅں کی موجودگی کی اطلاع ملنے کے بعد فوج ، سی آر پی ایف اور جموں کشمیر پولیس نے مشتر کہ طور پر جمعرات کے بعد دوپہر علاقے کو محاصرے میں لیا اور تلاشی آپریشن شروع کر دیا ۔ ذرائع کے مطابق جونہی علاقے میں فوج و فورسز نے تلاشی آپریشن شروع کر دیا تو وہاں چھپے بیٹھے جنگجوﺅںنے فرار ہونے کی کوشش میں فورسز پر فائرنگ کی جس کے ساتھ ہی فورسز نے بھی مورچہ زن ہوکر جوابی کارروائی کی اور علاقے میں دو بدو جھڑپ شروع ہوئی ۔ فائرنگ کے ساتھ ہی علاقے میں جنگجوﺅں کے فرار ہونے کے تمام راستے سیل کر دئے گئے جبکہ محاصرے میں پھنسے جنگجوﺅں کو خود سپردگی کرنے کیلئے کہا گیا تاہم انہوں نے پیشکش ٹھکرا دی ۔ ذرائع کے مطابق اسی دوران محاصرے میں پھنسے دو جنگجوﺅں کے خلاف کارورائی عمل میںلائی گئی اور کچھ وقت بعد ہی جب علاقے میں گولیوں کا تبادلہ تھم گیا تو جھڑپ کے مقام سے ایک جنگجو کی نعش بر آمد کر لی گئی ۔ پولیس نے اس کی تصدیق کرتے ہوئے بتایا کہ جھڑپ میں ایک جنگجو جاں بحق ہو گیا ہے او ر علاقے میں آپریشن جاری ہے ۔ انہوں نے بتایا کہ علاقے میںآپریشن جاری ہے اور تمام صورتحال آپریشن ختم ہونے کے بعد ہی واضح ہو گی ۔