بحر ہند کانفرنس 2024 کیلئے پرتھ کے دورے کا منتظر ہوں۔ وزیر خارجہ

نئی دہلی / وزیر خارجہ ایس جے شنکر نے جمعہ کو ہندوستان میں آسٹریلیا کے ہائی کمشنر فلپ گرین سے ملاقات کی اور دونوں ممالک کے درمیان دو طرفہ شراکت داری پر تبادلہ خیال کیا۔  وزیر خارجہاس سال کے آخر میں بحر ہند کانفرنس 2024 کے لیے پرتھ بھی جائیں گے۔ وزیرخارجہ  نے ایکس پر پوسٹ کیا  کہ آسٹریلیا کے ہائی کمشنر فلپ گرین سے آج سہ پہر میں مل کر خوشی ہوئی۔ ہندوستان-آسٹریلیا شراکت داری کے اگلے اقدامات کے بارے میں بات کی۔   بحر ہند کانفرنس 2024 کے لیے، پرتھ کے میرے آنے والے دورے کا منتظر ہوں۔  آسٹریلیا کے وزیر خارجہ، پینی وونگ نے گزشتہ سال اعلان کیا تھا کہ آسٹریلیا بحر ہند کانفرنس 2024 کی میزبانی کرے گا اور یہ خطے کو درپیش کلیدی چیلنجوں کے لیے عملی حل پر بات کرنے کا موقع ہوگا۔ بحر ہند کانفرنس 2016 میں سنگاپور میں شروع ہوئی تھی جس میں 30 ممالک شامل تھے۔ چھٹی بحر ہند کانفرنس گزشتہ سال مئی میں بنگلہ دیش کے شہر ڈھاکہ میں منعقد ہوئی تھی۔ گزشتہ چھ سالوں میں یہ کانفرنس علاقائی امور پر خطے کے ممالک کے لیے ایک مشاورتی فورم کے طور پر ابھری ہے۔ بحر ہند کانفرنس خطے کی اہم ریاستوں اور اہم سمندری شراکت داروں کو ایک مشترکہ پلیٹ فارم پر اکٹھا کرنے کے لیے کام کرتی ہے تاکہ خطے میں سب کے لیے سلامتی اور ترقی کے لیے علاقائی تعاون کے امکانات پر غور کیا جا سکے۔ پچھلے سال، دونوں ممالک نے ہندوستان-آسٹریلیا 2+2 دفاعی اور وزارت خارجہ مذاکرات کا بھی انعقاد کیا۔ اس کی مشترکہ صدارت وزیر دفاع راج ناتھ سنگھ، وزیر خارجہ ایس جے شنکر، آسٹریلیا کے نائب وزیر اعظم اور وزیر دفاع رچرڈ مارلس اور آسٹریلیا کے وزیر برائے امور خارجہ پینی وونگ نے کی۔