جموں کشمیر بینک کے سابق چیرمین پرویز احمد کی پیپلز کانفرنس میں شمولت

جموں کشمیر بینک کے سابق چیرمین اور سی ای او پرویز احمد نے پیپلز کانفرنس میں باضابطہ طور پر شرکت کرلی ہے ۔ پی سی کے چیرمین سجاد غنی لون اور پارٹی کے دیگر سینئر لیڈران نے موصوف شاندار طریقے سے پارٹی میں استقبال کیا ۔ اس موقعے پر پارٹی میں ان کا استقبال کرتے ہوئے سجاد غنی لون نے کہا ہے کہ ان کی موجودگی میں پارٹی مزید مضبوط ہوگی اور ہمیں عوامی خدمت میں مزید حوصلہ فراہم ہوگا۔ انہوںنے کہاکہ پرویز احمد کا ماضی شاندار رہا ہے اور انہوںنے جموںکشمیر کو معاشی لحاظ سے کافی ترقی پر پہنچایا ہے۔ اس دوران پرویز احمد نے پیپلز کانفرنس میں شمولیت پر خوشی کا اظہار کرتے ہوئے کہا کہ وہ پی سی صدر کی سوچ ، وژن اور جموں و کشمیر میں سماجی و اقتصادی ترقی کے نئے دور کے آغاز کی گہری خواہش سے متاثر ہوئے ہیں۔”مجھے اس سے پہلے کئی دہائیوں سے پیشہ ورانہ صلاحیت کے ساتھ جموں و کشمیر کے عوام اور پریمیئر اداروں کی خدمت کرنے کا شرف حاصل ہوا ہے۔ اب میری خواہش ہے کہ پیپلز کانفرنس کے تحت کام کرتے ہوئے تبدیلی کے لیے جامع سیاسی اور معاشی ادارے بنانے میں اپنی خدمات انجام دوں۔ انہوں نے مزید کہا کہ ہمیں سیاسی اور اقتصادی طور پر بہت بڑے چیلنجوں کا سامنا ہے اور اب وقت آگیا ہے کہ ہم جموں و کشمیر میں پائیدار سماجی و اقتصادی ترقی اور ترقی کو یقینی بنانے کے لیے اجتماعی اور ادارہ جاتی حل تلاش کریں۔