برطانیہ مزید 350 فوجی اہلکار پولینڈ کی سرحد پر بھیجے گا

نئی فوجی نفری پہلے سے موجود 100 برطانوی فوجیوں کے دستے کو مضبوط کریگی: وزیر دفاع
لندن(یواین آئی) برطانوی وزیر دفاع بین ویلس نے کہا ہے کہ برطانیہ مزید 350 فوجی اہلکار پولینڈ کی سرحد پر بھیجے گا۔ برطانوی وزیر دفاع نے یہ بات مشرقی یوروپ میں جاری روس یوکرین تنازع کے تناظر میں کہی۔ ان کا مزید کہنا تھا کہ نئی فوجی نفری پہلے سے موجود 100 برطانوی فوجیوں کے دستے کو مضبوط کرے گی۔ برطانوی وزیر دفاع بین ویلس نے کہا کہ فوجیوں کی تعیناتی کا مقصد مضبوط اشارہ دینا ہے کہ برطانیہ اور پولینڈ ساتھ کھڑے ہیں۔ دریں اثناءبرطانوی وزیر اعظم بورس جانسن نے کہا ہے کہ برطانیہ جنوب مشرقی یورپ کے دفاع اور ایسٹونیا میں برطانیہ کے جنگی گروپ کو مضبوط کرنے کیلئے رائل نیوی کے جنگی جہازوں کو تعینات کرنے پر غور کر رہا ہے۔ مسٹر جانسن نے ٹائمز کو لکھاکہ ہم جنوب مشرقی یورپ کے دفاع کے لیے آر اے ایف ٹائفون فائٹرز اور رائل نیوی کے جنگی جہازوں کو تعینات کرنے پر غور کر رہے ہیں۔انہوں نے کہا کہ مغرب یوکرین کو اپنے دفاع میں مزید مدد کرے گا۔ برطانیہ ایسٹونیا میں اپنی قیادت میں نیٹو کے جنگی گروپ کو مضبوط کرنے کی تیاری کر رہا ہے ۔مسٹر جانسن نے کہاکہ نیٹو اتحادیوں نے اتفاق کیا ہے کہ ہم اپنے اتحادیوں کے تحفظ کی ضمانت کیلئے مشرقی سرحد پر مزید فوجی بھیجنے کیلئے تیار ہیں۔ لٹویا اور ایسٹونیا کے وزرائے خارجہ نے بیلاروس میں روسی فوج کی تشکیل کے باعث اضافی تعاون کا مطالبہ کیا ہے ۔ ہم اسے فراہم کرنے کیلئے تیار ہیں۔