اومیکرون اور ڈیلٹا ویرینٹس پوری دنیا کیلئے دوہرا خطرہ

معاملے سونامی کی طرح بڑھ رہے ہیں، رہنما اصولوں کو اپنانا بہت ضروری :ڈبلیو ایچ او
جنیوا(یو این آئی) ورلڈ ہیلتھ آرگنائزیشن (ڈبلیو ایچ او) کے ڈائریکٹر جنرل ٹیڈروس گیبریس نے کووڈ-19 کے اومیکرون اور ڈیلٹا ویرینٹس کو دوہرا خطرہ قرار دیتے ہوئے کہا کہ ان کے کیسز سونامی کی طرح بڑھ رہے ہیں۔ مسٹر گیبریس نے بدھ کے روز ایک بیان میں کہا کہ کورونا کی ان دو شکلوں کے دوہرے خطرے کے باعث کیسز کی تعداد میں اضافہ ہو رہا ہے اوراسپتالوں میں مریضوں اور اموات کی تعداد میں دوبارہ اضافہ ہو گا۔ انہوں نے کہا ”مجھے گہری تشویش ہے کہ ڈیلٹا کی طرح اومیکرون بھی انتہائی متعدی ہے ۔ اس وائرس کے کیسز تیزی سے بڑھ رہے ہیں۔ یہ اس تیزی سے پھیل رہا ہے کہ ویکسینیشن کے علاوہ صحت کے رہنما اصولوں کو اپنانا بھی بہت ضروری ہو گیا ہے تاکہ وائرس کے کیسزکو کم کیا جا سکے ۔ ڈبلیو ایچ او کے ڈائریکٹر جنرل نے فارماسیوٹیکل کمپنیوں اور ترقی یافتہ ممالک کے رہنماو¿ں پر زور دیا ہے کہ وہ کورونا کے الفا، بیٹا، گاما، ڈیلٹا اور اومیکرون کی مختلف اقسام سے سبق حاصل کریں اور 70 فیصد آبادی کو ویکسین پلانے کا ہدف مقرر کرنے کی اپیل کی۔