ترکی سے تقریباً 230 افغان تارکین وطن کو ملک بدر کر دیا گیا

x کابل/۔ناکافی دستاویزات کی وجہ سے کل 230 افغان تارکین وطن کو ترکی کے مختلف شہروں سے ملک واپس بھیج دیا گیا ہے۔   خامہ پریس نے ترک ذرائع ابلاغ کے حوالے سے اطلاع دی ہے کہ  زیادہ تر افغان مہاجرین جنہیں ملک بدر کیا گیا، غیر مجاز اور غیر قانونی تارکین وطن تھے۔  رپورٹس کے مطابق ترک حکومت نے زور دیا ہے کہ وہ مشرقی شہر آگری میں غیر مجاز پناہ گزینوں کا سراغ لگاتی رہے گی۔ خامہ پریس کے مطابق، پچھلے سال کے دوران 124,441 غیر دستاویزی مہاجرین میں سے، ترکی کے جنرل ڈائریکٹوریٹ آف مائیگریشن نے اس سے قبل 68,290 افغان پناہ کے درخواست گزاروں کو ملک بدر کرنے کی اطلاع دی تھی۔ اگست 2021 میں طالبان کے افغانستان پر دوبارہ کنٹرول کے بعد سے جسمانی طور پر ہراساں کیے جانے، ایذا رسانی یا قتل کیے جانے کے خوف سے ہزاروں افغان ہمسایہ ممالک میں فرار ہو گئے ہیں۔ خامہ پریس نے ایک افغان پناہ گزین کے حوالے سے کہا، "افغانستان واپس آنا خودکشی کے مترادف ہے۔ میں نے ترکی پہنچنے کے لیے کافی تکلیفیں جھیلیں، اور اب وہ مجھے زبردستی اپنے ملک ڈی پورٹ کر رہے ہیں۔ میرے پاس اب اپنی زندگی ختم کرنے کے سوا کوئی چارہ نہیں ہے۔ طالبان کے اقتدار پر قبضے کے بعد افغان تارکین وطن کی اکثریت نے قریبی ممالک جیسے ایران، پاکستان اور ترکی کا سفر کرنے کے لیے خطرناک اور غیر قانونی راستے اختیار کیے تھے۔ وہ مہینوں سے خوف کی زندگی گزار رہے ہیں، اور اب انہیں جیل اور جبری جلاوطنی کا سامنا ہے۔