موہن بھاگوت نے آر ایس ایس ہیڈکوارٹر پر ترنگا لہرایا

ناگپور، 15 اگست (یو این آئی) راشٹریہ سویم سیوک سنگھ (آر ایس ایس) کے سربراہ موہن بھاگوت نے پیر کو یہاں سنگھ ہیڈکوارٹر پر ترنگا لہرایا اور ہندوستان کو خود کفیل بنانے کی ضرورت پر زور دیا۔سخت حفاظتی انتظامات کے درمیان آر ایس ایس کے رضاکاروں کے ایک اجتماع سے خطاب کرتے ہوئے ڈاکٹر بھاگوت نے کہا کہ آج کا دن فخر اور عزم کا دن ہے ۔ بہت سے لوگوں کی قربانیوں کے بعد ملک کو آزادی ملی۔ یہ آزادی کسی کے رحم و کرم پر نہیں ملی اس لیے ہندوستان کو خود انحصاری کی ضرورت ہے ۔ انہوں نے اس بات پر زور دیا کہ جو لوگ آزاد ہونا چاہتے ہیں انہیں ہر چیز میں خود انحصار ہونا ہوگا۔انہوں نے یہ بھی کہا کہ لوگوں کو یہ نہیں پوچھناچاہیے کہ ملک اور معاشرہ انہیں کیا دے گا بلکہ یہ سوچیں کہ وہ ملک کی بہتری کے لیے کیا دے رہے ہیں۔ انہوں نے کہا کہ ترنگا قربانی کی علامت ہے اور ہماری کوششیں دنیا اور سب کی خوشحالی کے مفاد میں ہیں۔ انہوں نے کہا کہ لوگ معاشرے کے لیے کام کریں اور دوسرے ممالک کے لیے مثال قائم کریں۔آر ایس ایس کے سربراہ نے مزید کہا کہ ان کی تنظیم نے لوگوں میں حب الوطنی کے بارے میں بیداری پیدا کرنے کے لیے کام کیا ہے اور اس کا مقصد اسے ہماری روزمرہ کی زندگیوں میں شامل کرنا ہے ۔