ویڈیو کانفرنس کے ذریعے گفتگو، مذاکرات کا پانچواں دور اختتام پذیر
نئی دہلی، 11 اگست (یو این آئی) ہندوستان اور برطانیہ کے درمیان آزاد تجارتی معاہدے (ایف ٹی اے ) کے لیے بات چیت کا پانچواں دور مکمل ہو گیا ہے ۔ وزارت تجارت و صنعت نے جمعرات کو جاری کردہ ایک بیان میں کہا ہے کہ یہ مذاکرات 29 جولائی کو مکمل ہوئے ہیں۔ اس میں شامل افسران نے آمنے سامنے اور ویڈیو کانفرنس کے ذریعے ملی جلی گفتگو کی۔ کچھ گروپوں کا اجلاس نئی دہلی میں ہوا اور زیادہ تر عہدیداروں نے ورچول میٹنگ میں شرکت کی۔ بیان میں کہا گیا کہ مذاکرات کے اس دور کے لیے دونوں اطراف کے تکنیکی ماہرین نے 15 پالیسی شعبوں پر 85 مختلف سیشنوں میں معاہدے کے مسودے پر تفصیلی تبادلہ خیال کیا۔ ہندوستان اور برطانیہ میں حکام اکتوبر تک ایک جامع اور آزاد تجارتی معاہدے پر زیادہ تر بات چیت کو ختم کرنے کے ہدف کی سمت کام جاری رکھیں گے ۔