کنگنا رنوت کےخلاف غداری کا مقدمہ درج

اجمیر(یو این آئی) راجستھان کے اجمیر سے کانگریس کے سابق ایم ایل اے ڈاکٹر راج کمار جے پال نے فلم اداکارہ کنگنا رنوت کے خلاف ملک سے غداری کا مقدمہ درج کرایا ہے ۔ ڈاکٹر جے پال نے اپنے کانگریسی ساتھیوں کلدیپ کپور، فخرے معینی، شیو بنسل کے ساتھ آج اجمیر کے سول لائنس تھانے میں انچارج افسر اروند چرن کو شکایت پیش کرتے ہوئے ادا کارہ کنگنا رنوت کے خلاف ایف آئی آر درج کرائی ہے ۔ اپنی شکایت میں انہوں نے کہا کہ کنگنا کا وہ بیان جس میں انہوں نے کہا تھا کہ 1947 میں ملنے والی آزادی، بھیک میں ملنے والی آزادی تھی۔ یہ غداری کے زمرے میں آتا ہے ۔ ان کے اس بیان سے مجاہدین آزادی، ان کے خاندانوں اور ملک کے لوگوں کو سخت صدمہ پہنچا ہے ۔ پولس کو دی گئی رپورٹ میں انہوں نے ملزم اور اس کے سرپرستوں اور سازش میں ملوث لوگوں کی گرفتاری کا مطالبہ کیا ہے ۔