آشا پاریکھ کو پھالکے ایوارڈ

صدر مرمو اعزاز سے سرفراز کریں گی
نئی دہلی، 27 ستمبر (یو این آئی) ‘کٹی پتنگ’، ‘میرا گاوں میرا دیش’ اور ‘لو ان ٹوکیو’ جیسی یادگار فلموں میں شاندار کردار ادا کرنے والی اپنے وقت کی عظیم اداکارہ آشاپاریکھ کو سال 2020 کے لئے دادا صاحب پھالکے ایوارڈ سے نوازا جائے گا۔ صدر محترمہ دروپدی مرمو 30 ستمبر کو نئی دہلی میں 68 ویں قومی فلم ایوارڈ کی تقسیم کی تقریب میں محترمہ پاریکھ کو ایوارڈ پیش کریں گی۔52ویں دادا صاحب پھالکے ایوارڈ کی جیوری کے فیصلے کا اعلان کرتے ہوئے مرکزی وزیر انوراگ ٹھاکر نے منگل کو کہاکہ "مجھے یہ اعلان کرتے ہوئے فخر محسوس ہو رہا ہے کہ دادا صاحب پھالکے سلیکشن جیوری نے آشا پاریکھ جی کو ہندوستانی سنیما میں ان کی مثالی کردار کے لیے اعزاز سے سرفراز کرنے کا فیصلہ کیا ہے ۔مسٹر ٹھاکر نے یہ بھی اعلان کیا کہ 68 ویں قومی فلم ایوارڈز 30 ستمبر کو نئی دہلی میں منعقد ہوں گے اور اس کی صدارت ہندوستان کی صدر دروپدی مرمو کریں گی۔فلموں میں اداکاری کے علاوہ محترمہ آشا پاریکھ نے ہدایت کار اور پروڈیوسر کے کردار سے بھی ہندوستانی سنیما کو مالا مال کیا۔ انہوں نے ایک قابل ہندوستانی کلاسیکل رقاصہ کے طور پر سنیما اور کوریوگرافی سے محبت کرنے والوں کے ذہنوں پر بھی انمٹ نقوش چھوڑے ہیں۔چائلڈ آرٹسٹ کے طور پر اپنے کیرئیر کا آغاز کرتے ہوئے انہوں نے ‘دل دے کے دیکھو’ میں مرکزی ہیروئن کے طور پر قدم رکھا اور 95 سے زائد فلموں میں اداکاری کی۔ انہوں نے ‘تیسری منزل’، ‘آیا ساون جھوم کے ’، ‘آن ملو سجنا’، ‘میرا گاوں میرا دیش’ جیسی مشہور فلموں میں بھی یادگار اداکاری کی ہے ۔ محترمہ پاریکھ کو پھالکے ایوارڈ دینے کا فیصلہ پانچ رکنی جیوری نے کیا۔ اس جیوری میں محترمہ آشا بھوسلے ، محترمہ ہیما مالنی، محترمہ پونم ڈھلون، مسٹر ٹی ایس۔ ناگبھرن اور مسٹر ادت نارائن تھے ۔ آشا پاریکھ کو 1992 میں پدم شری سے نوازا گیا تھا۔ وہ سنٹرل بورڈ آف فلم سرٹیفیکیشن کے سربراہ کے طور پر بھی 1998-2001 تک خدمات انجام دے چکی ہیں۔