امسال سے نیا امتحانی سیشن لاگوکئے جانے کاقوی امکان

10ویں اور 12ویں کے سالانہ امتحانات مارچ2023 میں کرائے جانے کی توقع
مارچ تا مارچ سیشن کی تجویز تقریباً حتمی ، صرف رسمی حکمنامہ جاری کرنے کی ضرورت:حکام
جموں و کشمیرکی انتظامیہ نومبر2022کے بجائے مارچ2023 میں اسکولی امتحانات لینے پر غورکررہی ہے ،جسکے تحت پرائمری سے ہائر سیکنڈری سطح تک کے تمام اسکولی امتحانات امسال نومبر میں لینے کے بجائے اگلے سال مارچ منتقل کرنے پر غور کیاجارہاہے ۔حکام کاحوالہ دیتے ہوئے ایک نیوز رپورٹ میں بتایاگیاکہ اس سلسلے میں محکمہ سکول ایجوکیشن جلد ہی اس تجویز پرکوئی حتمی فیصلہ کرے گا۔حکام کے مطابق محکمہ اسکولی تعلیم سنجیدگی سے پرائمری سے ہائر سیکنڈری سطح تک کے اسکولوں کے امتحانی سیشن کو نومبر سے مارچ تک منتقل کرنے پر غور کر رہا ہے۔نیوزرپورٹ کے مطابق امتحانی سیشن کاوقت تبدیل کرنے کے اس اقدام کے پیچھے کی وجہ بتاتے ہوئے، سرکاری عہدیداروں نے کہاکہ نومبر میں کلاس 10ویں یا کلاس12ویں کے امتحانات لینے کے باوجود، جو طلباءجموں وکشمیر سے باہر پروفیشنل کورسز میں داخلہ لینا چاہتے ہیں، تاہم انہیں نئی تعلیمی مدت یاتعلیمی سیشن تک انتظار کرنا پڑتا ہے کیونکہ بیرون جموں وکشمیرکی یونیورسٹیاں اوردیگرتعلیمی وپیشہ وارانہ ادارے اپنا سیشن جولائی میں شروع کرتے ہیں۔مقامی انگریزی اخبار میں چھپی نیوز رپورٹ میں مزید بتایاگیاہے کہ سرکاری عہدیداروں نے کہا کہ نومبر کے سیشن کی وجہ سے طلباءکا قیمتی وقت ضائع ہوتا ہے۔انہوںنے مزید کہا کہ اس اقدام سے تعلیمی سیشن پورے اسکولوں کے مطابق ہوگا۔رپورٹ کے مطابق یہ مزید انکشاف ہوا کہ مارچ تا مارچ سیشن کی تجویز تقریباً حتمی ہو چکی ہے اور اب صرف رسمی حکم کی ضرورت ہے۔نیوز رپورٹ کے مطابق ایس ای ڈی کے ایک سینئر افسر نے کہاکہ اس سلسلے میں تمام تیاریاں مکمل کر لی گئی ہیں، اور ہم توقع کر رہے ہیں کہ 10ویں اور 12ویں کے سالانہ امتحانات اس سیشن میں مارچ میں ہوں گے۔یہ اقدام موجودہ تعلیمی سیشن سے شروع ہونے والے ہائیر ایجوکیشن ڈیپارٹمنٹ (ایچ ای ڈی) میں قومی ایجوکیشن پالیسی 2020 اور یکساں تعلیمی کیلنڈر کو بیک وقت نافذ کرنے کے حکومت کے فیصلے کے بعد کیا گیا ہے۔رپورٹ میں ایس ای ڈی کے ایک اعلیٰ اہلکار کے حوالے سے مزید بتایاگیاہے کہ ، اس تناظر میں جموں و کشمیر کے چیف سکریٹری ڈاکٹر ارون کمار مہتا نے اس سال اپریل میں ایک اعلیٰ سطحی میٹنگ کی صدارت کی تاکہ جموں و کشمیر میں قومی تعلیمی پالیسی2020 کو لاگو کرنے کی حکمت عملیوں کا جائزہ لیا جائے اور اس پر تبادلہ خیال کیا جا سکے۔میٹنگ میں یہ بھی طے پایا کہ موجودہ تعلیمی سال کا آغاز جموں وکشمیر کے کالجوں میں UGCیونیورسٹی گرانٹس کمیشن کے معیارات کے مطابق چار سالہ انڈرگریجویٹ پروگرام کے آغاز کے ساتھ کیا جائے گا۔