درجہ حرارت میں کمی ریکارڈ ، آج سے 24جولائی تک بارشوں کی پیشگوئی

تازہ پسیاں گر آنے کے بعد سرینگر جموں شاہراہ پر ٹریفک کی نقل و حمل بند ، بحالی کا کام ہنگامی بنیادوں پر جاری
شدید گرمی کے بیچ ٹنل کے آر پار بارشوں کے پیشگوئی کے چلتے جموں اور جنوبی کشمیر کے کئی علاقوں میں ہلکی بارشوں سے درجہ حرارت میںکمی ریکارڈ کی گئی اور لوگوں نے شدید گرمی کی لہر سے راحت کی سانس لی ۔ ادھر محکمہ موسمیات نے آئندہ 24گھنٹوں تک مزید بارشوں کے ساتھ ساتھ تیز ہوائیوں کی بھی پیشگوئی کرتے ہوئے 24جولائی تک گرج چمک کے ساتھ کہیں کہیں ہلکی بارشوں کا امکان ظاہر کیا ہے۔ ادھر تازہ بارشوں کے بعد سرینگر جموں شاہراہ پر پسیاں گر آنے کے بعد ٹریفک کی آمد رفت کچھ گھنٹوں تک بند رہی ۔ تفصیلات کے مطابق محکمہ موسمیات کی پیشگوئی کے عین مطابق منگل اور بدھ کی درمیانی رات سے موسمی صورتحال میں تبدیلی آئی جس دوران جنوبی کشمیر کے کئی علاقوں کے ساتھ ساتھ جموں میںبھی بارشیں درج ہوئی ۔خیال رہے کہ وادی کشمیر میں امسال خراب موسمی صورتحال کے بعد ماہ جون اور جولائی میں شدید گرمی کی لہر دیکھنے کو ملی جس کے نتیجے میں اہل وادی کو مشکلات میں مبتلا کیا ۔ کچھ دنوں کی شدید گرمی کے بیچ محکمہ موسمیات کی پیشگوئی کے عین مطابق منگل اور بدھ کی درمیانی رات سے جنوبی کشمیر کے میدانی علاقوں میں بارشوں کا سلسلہ شروع ہوئی ۔ منگل اور بدھ کی درمیانی رات کو بارشوں کا سلسلہ ہوا جبکہ بالائی علاقوں خاص طور پر مشہور سیاحتی مرکز گلمرگ اور دیگر کئی مقامات پر ہلکی بارشیں ہوئی ۔محکمہ موسمیات کے مطابق سرینگر میں کم سے کم درجہ حرارت19.6 ڈگری سینٹی گریڈ ریکارڈ کیا گیا جو معمول سے1.2 ڈگری سینٹی گریڈ زیادہ ریکارڈ ہوا تھا۔سیاحتی مقام گلمرگ میں کم سے کم درجہ حرارت11.5ڈگری سینٹی گریڈ ریکارڈ کیا گیا جو معمول سے0.6 ڈگری سینٹی گریڈ کم ریکارڈ ہوا تھا۔ وادی کے دوسرے مشہور سیاحتی مقام پہلگام میں کم سے کم درجہ حرارت15.4 ڈگری سینٹی گریڈ ریکارڈ ہوا تھا جو معمول سے2.9 ڈگری سینٹی گریڈ زیادہ ریکارڈ ہوا تھا۔سرحدی ضلع کپوارہ میں کم سے کم درجہ حرارت16.3 ڈگری سینٹی گریڈ ریکارڈ کیا گیا جو معمول سے0.7 ڈگری سینٹی گریڈ کم ریکارڈ ہوا تھا۔ قاضی گنڈ میں کم سے کم درجہ حرارت18.6 ڈگری سینٹی گریڈ ریکارڈ کیا گیا جو معمول سے1.9 ڈگری سینٹی گریڈ زیادہ ریکارڈ ہوا تھا۔ دریں اثناءمحکمہ موسمیات نے بتایا کہ وادی میں آئندہ 24گھنٹوں تک مطلع ابر آلود رہنے کا امکان ہے اور اس دوران بارشیں بھی ہوسکتی ہے ۔ محکمہ موسمیات کے مطابق 24جولائی کی صبح سے موسمی صورتحال میں بتدریج بہتری آئے گی ۔ ادھر سرینگر جموں شاہراہ پر تازہ بارشوں کے نتیجے میں پسیاں گر آئی جس کے بعد شاہراہ کو ٹریفک کی آمد رفت کیلئے بند کر دیا گیا ۔ محکمہ ٹریفک کے ایک سنیئر آفیسر نے اس کی تصدیق کرتے ہوئے بتایا کہ سرینگر جموں شاہراہ پر موسم کی خرابی کے سبب پتھر گر آنے کے نتیجے میں ٹریفک کی نقل و حمل معطل کی گئی ہے۔حکام نے تفصیلات فراہم کرتے ہوئے کہا کہ شاہراہ پرضلع رام بن کے پنتھیال۔ مگھر کوٹ علاقے میں بارش کی وجہ سے پتھر گر آنا شروع ہوگئے جس کے بعد کچھ وقت تک ٹریفک کی نقل و حمل بند ہوئی ۔ادھر شبانہ درجہ حرارت میں ایک بار پھر اضافہ درج ہونے کے ساتھ محکمہ موسمیات نے وادی کشمیر میں اگلے چوبیس گھنٹوں کے دوران گرج چمک کے ساتھ ہلکی بارشوں کی پیش گوئی کی ہے۔متعلقہ محکمے کے ایک ترجمان کے مطابق وادی کشمیر میں اگلے چوبیس گھنٹوں کے دوران گرج چمک کے ساتھ کہیں کہیں ہلکی بارشوں کا امکان ہے۔