دہلی میں کورونا کی نئے سے دستک ، کیسوں میں آئے روز اضافہ ریکارڈ

ہر ایک کیلئے ماسک پہننا لازمی قرار ، بغیر ماسک کے جرمانہ دینا ہوگا
دہلی میں کورونا کے بڑھتے ہوئے معاملات کے درمیان اب ایک بار پھر ماسک لگانا لازمی کر دیا گیا ہے۔ ذرائع کے مطابق ماسک نہ لگانے پر 500 روپے جرمانہ ہوسکتا ہے۔اطلاعات کے مطابق دلی میں کوودڈ کی دوبارہ دستک کے بعد ایک بار پھر ماسک لگانا لازمی کر دیا گیا ہے۔ یہ فیصلہ ڈسٹرکٹ ڈیزاسٹر مینجمنٹ اتھارٹی (ڈی ڈی ایم اے) کی میٹنگ میں بڑھتے ہوئے معاملات کے بعد لیا گیا ہے۔تاہم بدھ کو میڈیا سے بات کرتے ہوئے نائب وزیر اعلیٰ منیش سسودیا نے کہا تھا کہ گھبرانے کی ضرورت نہیں ہے۔اطلاعات کے مطابق اجلاس میں فیصلہ کیا گیا ہے کہ اسکول ابھی بند نہیں کئے جائیں گے، اسکول کے لئے ماہرین سے بات کرکے ایس او پیز جاری کئے جائیں گے۔ اس کے ساتھ ٹیسٹنگ کو مزید بڑھانے پر بھی بات ہوئی ہے۔ ویکسینیشن میں تیزی لانے کا بھی فیصلہ کیا گیا ہے۔واضح رہے کہ مرکزی حکومت نے منگل کو دہلی، اتر پردیش، ہریانہ، مہاراشٹرا اور میزورم کو کہیں بھی کورونا کے انفیکشن کو پھیلنے سے روکنے کے لیے سخت نگرانی رکھنے اور تشویش والے علاقوں میں ضرورت پڑنے پر پیشگی اقدامات کرنے کا مشورہ دیا تھا۔ایک خط میں مرکزی صحت کے سکریٹری راجیش بھوشن نے دہلی اور چار ریاستوں کو مشورہ دیا تھا کہ وہ”ٹیسٹ، پتہ لگانے، علاج، ویکسینیشن اور کووڈ کے مناسب رویے کی پیروی“ کی پانچ جہتی حکمت عملی پر عمل کریں۔ اس کے علاوہ خط میں بھیڑ والی جگہوں پر ماسک پہننے پر خصوصی زور دیا گیا ہے۔خط میں کہا گیا ہے کہ ”یہ ضروری ہے کہ ریاستیں سخت چوکسی برقرار رکھیں اور اگر ضروری ہو تو تشویش والے مقامات پر جلد از جلد اقدامات کریں تاکہ کہیں بھی کورونا وائرس کے انفیکشن کو پھیلنے سے روکا جا سکے۔“ انہوں نے خط میں کہا تھا۔ کووڈ کے انتظام میں اب تک حاصل کی گئی کامیابی کو شکست دے گا۔ اہم بات یہ ہے کہ ان ریاستوں اور قومی راجدھانی میں اس ہفتے انفیکشن کے معاملات میں نمایاں اضافہ ہوا ہے۔