بڈگام میں نامعلوم بندوق برداروں کے ہاتھوں شہری ہلاک

پلوامہ میں بندوق برداروں نے غیر مقامی شخص پر گولی چلاکر زخمی کیا
سرینگر/جی این ایس/
وسطی کشمیر کے ضلع بڈگام کے غوطہ پورہ علاقے میں سوموار کے روز اُس وقت افراتفری اور خوف و دہشت پھیل گیا جب نامعلوم بندوق برداروں نے ایک شہری پر گولیاں چلاکر اس کو شدید زخمی کردیا جو زخموں کی تاب نہ لاکر دم توڑ بیٹھا۔ اس دوران پولیس، اور فورسز نے حملہ آوروں کی تلاش شروع کرتے ہوئے وسیع علاقے کو محاصرے میں لیا ہے ۔دریں اثناءجنوبی کشمیر کے ضلع پلوامہ میں سوموار شام دیر گئے نامعلوم بندوق برداروں نے ایک غیر مقامی شخص پر گولیاں چلاکر زخمی کردیا ۔ اطلاعات کے مطابق سوموار کے روز بڈگام کے غوطہ پورہ علاقے میں شام دیر گئے اُس وقت افراتفری کا ماحول پھیل گیا جب نامعلوم بندوق برداروں نے ایک شہری تجمل محی الدین راتھر کو اپنے ہی گھر کے نزدیک گولیاں چلاکر شدید زخمی کردیا ۔ اس دوران تجمل کو شدید زخمی حالت میں اگرچہ ہسپتال لے جانے کی کوشش کی گئی تاہم وہ زخموں کی تاب نہ لاکر راستے میں ہی دم توڑ بیٹھا۔ اس واقعے کی تصدیق کرتے ہوئے پولیس کے ایک آفیسر نے بتایا کہ پولیس نے اس سلسلے میں ابتدائی رپورٹ درج کرلی ہے اور معاملے کی تحقیقات جاری ہے ۔ ادھر ذرائع نے بتایا کہ اس واقعے کے نتیجے میں علاقے میں خوف و ہراس پھیل گیا ۔ مہلوک شہری کو کن وجوہات کی بناءپر گولی مار دی گئی اس بات کو فوری طور پر پتہ نہیں چلا ہے ۔ دریں اثناءجونہی اس واقعے کی خبر آس پاس کے علاقوں تک پہنچی تو لوگوں کی بڑی تعداد مہلوک کے گھر پہنچی جہاں انہوں نے مہلوک کے ورثاءکی ڈھارس بندھائی ۔ ادھر پولیس اور فورسز نے اس واقعے کے فوراً بعد وسیع علاقے کو محاصرے میں لیکر بندوق بردارں کی تلاش شروع کردی ہے اور گھر گھر تلاشی شروع کی تاہم آخری اطلاع ملنے تک کسی کے گرفتار ہونے کی کوئی خبر نہیں ہے ۔ یہاں یہ بات قابل امر ہے کہ وادی کشمیر میں گزشتہ ماہ سے تشدد آمیز واقعات میں کئی افراد ہلاک ہوئے ہیں جن میں مجموعی طور پر تین پنچائتی ممبران بھی شامل ہیںجبکہ گزشتہ ہفتے سنیچر وار کی شام کو جنوبی کشمیر میں بندوق برداروں نے ایک غیر ریاستی شخص پر گولیاں چلائیںجس کے نتیجے میں وہ زخمی ہوا تھا۔ ادھر معلوام ہوا ہے کہ جنوبی کشمیر کے ضلع پلوامہ میں نامعلوم بندوق برداروں نے سوموار کی شام کو ایک غیر مقامی شخص بسو جیت کمار ولد پارس مندن ساکن بہار پر گنگو نامی علاقے میں گولیاں چلاکر اسے زخمی کردیا ۔ غیر مقامی شخص کو شدید زخمی حالت میں فوری طور پر ضلع ہسپتال پلوامہ پہنچایا گیا جہاں سے اسے مزید علاج و معالجہ کےلئے سرینگر شفٹ کیا گیا ہے ۔ اس واقعے کی پولیس ذرائع نے تصدیق کرتے ہوئے بتایا کہ حملہ آوری کی تلاش جاری ہے ۔