ڈی سی سرینگر نے ڈرگ ڈی ایڈیکشن سنٹروں کامعائینہ کیا

متاثرین کے ساتھ تبادلہ خیال کیا ، روزگار کے حوالے سے انہیں ہر ممکن تعاون دینے کا یقین دلایا
سرینگر/
ڈپٹی کمشنر سرینگر محمد اعجاز اسد نے آج ڈرگ ڈی ایڈیکشن سنٹروں واقع ایس ایم ایچ ایس ہسپتال اور خانیار کا دورہ کیا جہاں انہوں نے متاثرہ نوجوانوں کو فراہم کی جانی والی طبی سہولیات اور کونسلک کے بارے میں جانکاری حاصل کی ۔ اس موقعے پر ضلع کمشنر نے قریب ایک درجن متاثرین سے بات کی جو ان ڈرگ ڈی ایڈیکشن سنٹروں میں زیر علاج ہیں ۔ انہوں نے ان سے سنٹروں میں انہیں فراہم کی جانے والے علاج اور کونسلنگ و دیگر سہولیات کے بارے میں معلومات کی ۔ مریضوں نے موصوف کو بتایا کہ انہیں سنٹروں میں اطمینان بخش علاج ، ادویات فراہم کی جارہی ہے ۔ انہوںنے بتایاکہ وہ منشیات کے مضر اثرات اور اس سے بچاﺅ کے بارے میں اب لوگوں کو پیغام دیں گے ۔ اور منشیات سے دور رکھنے کی صلاح دیں گے ۔ اس موقعے پر ضلع کمشنر نے انہیں بتایا کہ ضلع انتظامیہ کی جانب سے انہیں ہر ممکن مددفراہم کی جائے گی اور انہیں سرکاری ایمپلائمنٹ جنریشن پروگراموں کے ذریعے روزگار فراہم کرنے کی کوشش کی جائے گی۔ انہوںںے بتایا کہ متاثرین علاج کے بعد خود روزگار کماکر عزت کی زندگی گزار سکتے ہیں۔ انہوں نے کہا کہ اس بڑھتے ہوئے معاشرتی مسئلے سے نمٹنے کے لیے، منشیات کے استعمال پر نظر رکھنے اور اس لعنت پر قابو پانے کے لیے تدارکاتی اقدامات کرنے کے لیے کثیر الجہتی بحالی مشاورت اور رہنمائی کی پالیسی پر عمل درآمد کیا جا رہا ہے۔کمشنر موصوف نے نوجوانوں میں اس لعنت پر قابو پانے کے لیے خاندانوں خصوصاً والدین سے تعاون طلب کیا جو کہ دیگر سماجی برائیوں اور جرائم کی طرف بھی جاتا ہے۔ انہوں نے کہا کہ نوجوانوں کو منشیات کے استعمال سے دور رکھنے میں والدین کا اہم کردار ہے اور متاثرہ افراد کے لیے خاندانی تعاون بھی انہیں معمول کی زندگی کی طرف لے جا سکتا ہے۔ایس ایم ایچ ایس ہسپتال میں ڈی سی نے ڈاکٹروں اور دیگر پیرا میڈیکل سٹاف پر زور دیا کہ وہ اس کام کو ایک عظیم کام کے طور پر لیں اور متاثرہ افراد کے ساتھ صبر اور لگن سے پیش آئیں۔ انہوں نے کہا کہ نوجوان ہمارا قیمتی اثاثہ ہیں اور ہمیں ان کی توانائیوں کو مثبت انداز میں استعمال کرنا ہے۔ڈی سی کو بتایا گیا کہ یہ سنٹر ایک مربوط مرکز کے طور پر کام کرتا ہے جہاں متاثرہ نوجوانوں کا علاج، مشاورت اور ان کی زندگیوں میں دوبارہ مرکزی دھارے میں آنے کے قابل بنایا جاتا ہے۔چیف میڈیکل آفیسر سرینگر ڈاکٹر جمیل، چیف ایجوکیشن آفیسر منظور احمد، ڈپٹی ڈرگ کنٹرولر محمد یونس اور دیگر متعلقہ افسران دورے کے دوران ڈی سی کے ہمراہ تھے۔