محکمہ تعلیم نے 21 فروری سے اسکولوں کو دوبارہ کھولنے کی تجویز سٹیٹ ایگزیکٹو کمیٹی کے سامنے رکھی

وادی کشمیر میں موسم میں بہتری اور کووڈ19کے معاملات میں کمی کے بعد حکومت 21 فروری سے تعلیمی اداروں کو دوبارہ کھولنے پر غور کر رہی ہے ۔اطلاعات کے مطابق محکمہ تعلیم جموں کشمیر میں اب اسکولوں کو آف لائن طریقہ کار سے کھولنے کی تجویز سٹیٹ ایگزیکٹو کمیٹی کے سامنے رکھی ہے اور امید کی جا رہی ہے کہ جموں کشمیر میں اسکولوں کو دوبارہ سے 21فروری سے کھول دیا جائے گا ۔ محکمہ تعلیم کے ایک سنیئر آفیسر نے بتایا کہ تعلیمی نقصانات کی تلافی کیلئے اور موسم میں بہتری اور کووڈ۔ 19 کے معاملات میں کمی کو مدنظر رکھتے ہوئے ہم نے سٹیٹ ایگزیکٹو کمیٹی کو 21 فروری سے اسکولوں کو دوبارہ کھولنے پر غور کرنے کی تجویز دی ہے۔انہوں نے کہا کہ "تعلیمی نقصانات کی تلافی کرنا بہت ضروری ہے، اس کے علاوہ اسکول کے طلباءکی ایک بڑی تعداد نے کووڈ ویکسین کی دونوں خوراکیں لگائی ہیں،۔ خیال رہے کہ محکمہ سکول ایجوکیشن نے نومبر 2021 کے آخری ہفتے میں کشمیر صوبے کے تمام سرکاری اور تسلیم شدہ پرائیویٹ سکولوں اور جموں خطہ کے سرمائی علاقوں کے لیے 06 دسمبر سے ابتدائی اور 13 دسمبر سے اعلیٰ کلاسوں کے لیے موسم سرما کی تعطیلات کا اعلان کیا۔سکول ایجوکیشن ڈیپارٹمنٹ کے پرنسپل سکریٹری بی کے سنگھ نے کہا ہے کہ یہ فیصلہ ایک میٹنگ کے بعد کیا گیا جس میں کشمیر ڈویڑن اور جموں خطہ کے سرمائی علاقوں کے موسم سرما کی تعطیلات سمیت مختلف شیڈولز پر تبادلہ خیال کیا گیا۔سنگھ نے کہا کہ سرکاری تعلیمی اداروں اور 8ویں جماعت تک کے تسلیم شدہ نجی اسکولوں میں 06 دسمبر سے 28 فروری 2022 تک موسم سرما کی تعطیلات طے کی گئی تھیں۔