سپریم کورٹ کے 13 جج، 400 ملازمین کووڈ سے متاثر

نئی دہلی(یو این آئی) سپریم کورٹ کے 13 جج اور یہاں رجسٹری کے 400 ملازمین کووڈ-19 کی تیسری لہر کی زد میں آئے ہیں۔چیف جسٹس این۔ وی رمن نے خود منگل کو سماعت کے دوران عدالت میں کورونا کے مضر اثرات کے بارے میں یہ اطلاعات شیئر کیں۔ سماعت کے دوران ایک وکیل نے بنچ کے سامنے شکایت کی کہ ان کا کیس فوری سماعت کے لیے سپریم کورٹ رجسٹری میں درج نہیں ہے ۔اس پر چیف جسٹس نے وکیل سے کہا کہ عدالت کے تیرہ جج کے ساتھ ساتھ رجسٹری کا 400 عملہ کووڈ۔ 19 سے متاثر ہے ، اگر آپ کو مسائل کا علم نہیں تو ہم کیا کر سکتے ہیں۔جسٹس رمن نے مزید بتایاکہ "ہمارے ادارے تعاون نہیں کر رہے پھر بھی ہم کام کر رہے ہیں۔ براہ کرم اسے سمجھنے کی کوشش کریں۔”