اٹلی سے کورونا متاثر شخص جموں پہنچا، اومیکرون کاشبہ

اومیکرون جانچ کے لیے نمونے دہلی بھیجے گئے، ڈی آر ڈی او اسپتال میں داخل
جموں میں اومیکرون کے دو مشتبہ معاملات سامنے آئے ہیںجن سے اومیکرون کی جانچ کےلئے نمونے حاصل کرکے دلی لیبارٹی بھیج دئے گئے ہیں ۔ ان میں سے ایک آئر لینڈ کے بعد اٹلی سے جموں آیا ہوا تھا جو سفر کے بعد سیدھے اپنے گھر چلا گیاتھا۔اس دوران طیارے اور سفر میں ان کے رابطے میں آنے والوں کی تلاش شروع کردی گئی ہے ۔ اطلاعات کے مطابق آئرلینڈ کے بعد اٹلی سے جموں واپس آنے والے ترکوٹہ جموںکا 63 سالہ کورونا وائرس کا شکار نکلا ہے۔ اسے ڈی آر ڈی او اسپتال میں داخل کرایا گیا ہے۔ یہ مسافر امرتسر سے بذریعہ سڑک جموں پہنچا تھا، اورنگرانی میں اپنے گھر پہنچنے کے بعد اس کی شناخت ہوئی۔ مسافر کے رابطے میں آنے والے دیگر افراد کی بھی تلاش کی جا رہی ہے۔فی الحال مسافر کی حالت مستحکم ہے۔ اس کے جینوم کے نمونے کو جانچ کے لیے دہلی کی لیبارٹری بھیج دیا گیا ہے۔ اب تک، جموں میں دو غیر ملکی واپس آنے والے متاثر پائے گئے ہیں، جن پر اومیکرون کا شبہ ہے۔ کورونا انفیکشن کے نئے پیٹرن کے پیش نظر جموں و کشمیر میں چوکسی بڑھا دی گئی ہے۔بتایا جاتا ہے کہ اٹلی سے بذریعہ سڑک پہنچنے والا بزرگ سیدھا گھر چلا گیا۔ وہ 2 دسمبر کو جموں واپس آیا تھا اور اس کا آر ٹی پی سی آر ٹیسٹ 6 دسمبر کو نگرانی میں کیا گیا تھا۔ ان کی رپورٹ 7 دسمبر کی رات مثبت آئی تھی۔ اس کے بعد بزرگ کو ڈی آر ڈی او میں داخل کرایا گیا۔جموں ہوائی اڈے کے علاوہ ریلوے اسٹیشن اور لکھن پور روڈ کے ذریعے جموں پہنچنے والے غیر ملکی مسافروں پر نگرانی بڑھا دی گئی ہے۔ اس کے علاوہ جموں شہر کے چھنی راما لین-1 سے اب تک پانچ متاثرہ کیسز ملے ہیں، جن میں پہلے دو اور بعد میں تین کیسز پائے گئے ہیں۔اس کے پیش نظر اس علاقے کو مائیکرو کنٹینمنٹ زون بنانے کی تیاریاں کی جا رہی ہیں۔ انتظامیہ کے نئے رہنما خطوط میں اگر ایک ہی علاقے میں تین متاثرہ کیسز پائے جاتے ہیں تو اسے مائیکرو کنٹینمنٹ بنانے کا انتظام ہے۔