محکمہ موسمیات کی پیش گوئی

جموں و کشمیر میں شدید بارشوں، طغیانی اور بادل پھٹنے کا خدشہ
سرینگر/16اگست/وی او آئی//محکمہ موسمیات نے ہفتے کے روز جموں و کشمیر کے مختلف علاقوں میں 17 سے 19 اگست کے دوران شدید بارشوں اور گرج چمک کے ساتھ طوفانی موسم کی پیش گوئی کرتے ہوئے بادل پھٹنے، طغیانی، زمین کھسکنے، کیچڑ بہنے اور پتھروں کے گرنے جیسے خطرات سے خبردار کیا ہے۔وائس آف انڈیا کے مطابق دوران کئی مقامات پر ہلکی سے درمیانی بارشیں متوقع ہیں، جبکہ جموں ڈویژن کے اضلاع—جموں، ریاسی، ادھمپور، راجوری، پونچھ، سانبہ اور کٹھوعہ—میں شدید بارشوں کا امکان ظاہر کیا گیا ہے۔ ڈوڈہ، کشتواڑ اور رام بن میں بھی درمیانی شدت کی بارشیں متوقع ہیں، جبکہ کشمیر کے بعض علاقوں میں تیز ہواوں کے ساتھ مختصر مگر شدید بارشوں کا امکان ہے۔محکمہ موسمیات نے عوام کو مشورہ دیا ہے کہ وہ ندی نالوں، دریاوں کے کناروں اور غیر مستحکم ڈھانچوں سے دور رہیں، جبکہ مسافروں، سیاحوں، ٹرانسپورٹروں اور کوہ پیماو¿ں کو موسم کی صورتحال کے پیش نظر اپنے سفر کی منصوبہ بندی احتیاط سے کرنے کی ہدایت دی گئی ہے۔محکمہ نے مزید بتایا کہ 20 سے 22 اگست کے دوران خطے میں موسم عمومی طور پر گرم اور مرطوب رہے گا، تاہم چند مقامات پر گرج چمک کے ساتھ بارشیں ہو سکتی ہیں۔ 23 سے 25 اگست کے دوران ایک نیا سلسلہ ہلکی سے درمیانی بارشوں اور گرج چمک کے ساتھ دونوں ڈویژنز میں متوقع ہے۔