وزیر سکینہ مسعود اِیتو نے بڈگام کا دورہ کیا

کمیونٹی ہیلتھ سینٹر اور سب ڈِسٹرکٹ ہسپتال چاڈورہ میں صحت سہولیات کا معائینہ کیا
گورنمنٹ ڈگری کالج چاڈورہ کا بھی دورہ کیا اور اِدارے کی کارکردگی کا جائزہ لیا
وزیر برائے صحت و طبی تعلیم، تعلیم اور سماجی بہبود سکینہ مسعود اِیتو نے آج ضلع بڈگام کے چاڈورہ علاقے کا دورہ کیا اور علاقے میں صحت سہولیات کا جائزہ لیا۔اُنہوں نے دورے کے دوران کمیونٹی ہیلتھ سینٹر (سی ایچ سی) چترگام، سب ڈِسٹرکٹ ہسپتال (ایس ڈی ایچ) چاڈورہ کا معائینہ کیا اور وہاں مقامی لوگوں کے لئے دستیاب طبی سہولیات کا جائزہ لیا۔ اُنہوں نے گورنمنٹ ڈگری کالج چاڈورہ کا بھی دورہ کیا اور اس کی کارکردگی کا جائزہ لیا۔وزیر موصوفہ کے ہمراہ ایم ایل اے چاڈورہ علی محمد ڈار، ایم ایل اے بیروہ ڈاکٹر شفیع احمد وانی،ضلع ترقیاتی کمشنر بڈگام، ڈائریکٹر ہیلتھ سروسز کشمیر، ڈائریکٹر کالجز اور مختلف متعلقہ محکموں کے دیگر سینئر اَفسران بھی تھے۔وزیر نے کمیونٹی ہیلتھ سینٹر چترگام میں طبی خدمات کی دستیابی، بنیادی ڈھانچے اور عملے کی تعداد کا جائزہ لیا۔ اُنہوں نے کمیونٹی ہیلتھ سینٹر کا چکر لگایا اور ہسپتال کے جنرل وارڈوں ، ایمرجنسی وارڈاور دیگر یونٹوں کا معائینہ کیا۔اُنہوں نے کمیونٹی ہیلتھ سینٹر میں ڈاکٹروں اور پیرا میڈیکل سٹاف سے بات چیت کی اور اُنہیں مریضوں کو بہترین معیار کی طبی خدمات فراہم کرنے کی ہدایت دی۔محترمہ سکینہ مسعود اِیتو نے کہا،”صحت ہر فرد کے لئے سب سے اہم ہے اور اس لئے یہ ضروری ہے کہ ہم عوام کو بالخصوص دیہی علاقوں میں معیاری صحت خدمات فراہم کریں۔“اُنہوں نے ہسپتال اِنتظامیہ کو ہدایت دی کہ تمام ضروری اَدویات، آلات اور طبی عملے کی دستیابی کو یقینی بنایا جائے۔ اُنہوں نے کمیونٹی ہیلتھ سینٹر کی اِنتظامیہ کو ہدایت دی کہ ڈیوٹی روسٹر پر من و عن عمل کیا جائے تاکہ مطلوبہ عملہ اور ڈاکٹر کسی بھی ہنگامی صورتحال سے نمٹنے کے لئے چوبیس گھنٹے دستیاب ہوں۔وزیر موصوفہ نے کمیونٹی ہیلتھ سینٹر میں مریضوں اور تیمارداروں سے بھی اِستفساری گفتگو کی اور سینٹر میں فراہم کی جانے والی صحت خدمات کی صورتحال کے بارے میں ان سے موقعہ پر رائے حاصل کی۔اِس موقعہ پراُنہوں نے مقامی لوگوں سے بھی بات چیت کی جنہوں نے وزیر کو مختلف مختلف مسائل اورمطالبات گوش گزار کئے ۔ وزیر موصوفہ نے اُنہیں یقین دِلایا کہ اُن کے تمام جائز مطالبات اور مسائل کو فوری طور پر حل کیا جائے گا۔دریں اثنا، وزیر موصوفہ نے سب ڈِسٹرکٹ ہسپتال (ایس ڈِی ایچ) چاڈورہ کا بھی معائینہ کیا اور ہسپتال کے بنیادی ڈھانچے، مریضوں کی خدمات کے ساتھ ساتھ ایمرجنسی رسپانس میکانزم کا بھی جائزہ لیا۔بعد میں محترمہ سکینہ مسعود اِیتو نے گورنمنٹ ڈِگری کالج چاڈورہ کا بھی دورہ کیا اور اِس کے کام کاج کا جائزہ لیا۔ اُنہوں نے لیکچر ہال، لائبریری اور کالج کے دیگر حصوں کا معائینہ کیا۔ اُنہوں نے کالج کی مجموعی کارکردگی کو بہتر بنانے کے لئے فیکلٹی ممبران ، عملے اور طلبا¿ کے مسائل اور تجاویز کو سمجھنے کے لئے بات چیت کی۔اُنہوں نے دیہی علاقوں میں معیاری تعلیم فراہم کرنے کی اہمیت پر زور دیا۔ اُنہوں نے کالج اِنتظامیہ کو ہدایت دی کہ وہ تعلیمی معیار کو بہتر بنانے، بنیادی ڈھانچے کو بہتر بنانے اور غیر نصابی سرگرمیوں کو فروغ دینے پر توجہ مرکوز کرے۔اُنہوں نے گورنمنٹ ڈِگری کالج کی مجوزہ جگہ کا بھی معائینہ کیا۔ اُنہوں نے عمل آوری ایجنسی کے افسران کو ہدایت دی کہ وہ اس نئے پروجیکٹ کی بروقت تکمیل کے لئے جلد از جلد کام شروع کریں۔