خطے میں اسٹریٹجک توازن اور امن قائم کرنے میں مدد کرے گا اور ملک کی سلامتی میں فیصلہ کن کردار ادا کرے گا: راجناتھ
نئی دہلی/ اریہنت کلاس کی دوسری جوہری آبدوز ‘آئی این ایس اریگھاٹ’ جمعرات کو وشاکھاپٹنم میں بحریہ کے بیڑے میں شامل ہوگئی، جس سے بحریہ کی فائر پاور میں کئی گنا اضافہ ہوا۔اس موقع پر وزیر دفاع راجناتھ سنگھ اور کئی سینئر فوجی افسران اور سیکورٹی سیکٹر سے وابستہ اہلکار بھی موجود تھے ۔ اپنے خطاب میں مسٹر سنگھ نے یقین ظاہر کیا کہ ‘اریگھاٹ’ ملک کے جوہری صلاحیت کو مزید مضبوط کرے گا، جوہری ڈیٹرنس میں اضافہ کرے گا، خطے میں اسٹریٹجک توازن اور امن قائم کرنے میں مدد کرے گا اور ملک کی سلامتی میں فیصلہ کن کردار ادا کرے گا۔ انہوں نے اسے قوم کے لیے ایک کامیابی اور دفاعی شعبے میں ‘خود انحصاری’ کے حصول کے لیے حکومت کے غیر متزلزل عزم کا ثبوت قرار دیا۔ وزیر دفاع نے اس صلاحیت کو حاصل کرنے میں ہندوستانی بحریہ، ڈی آر ڈی او اور صنعت کی محنت اور تال میل کی تعریف کی۔ انہوں نے اس خود انحصاری کو خود اختیاری کی بنیاد قرار دیا۔ انہوں نے کہا کہ اس پروجیکٹ کے ذریعے ملک کے صنعتی شعبے کو خاص طور پر ایم ایس ایم ای کو زبردست فروغ ملا ہے اور روزگار کے مزید مواقع پیدا ہوئے ہیں۔ اریگھاٹ، اریہانت کلاس کی دوسری آبدوز، اریہانت کا اپ گریڈ ورژن ہے اور جدید ترین ہتھیاروں کے نظام اور آلات سے لیس ہے ۔ کامیاب سخت اور مسلسل آزمائشوں کے بعد اسے بحریہ کے حوالے کر دیا گیا ہے ۔ اریگھاٹ کی لمبائی 112 میٹر، چوڑائی 11 میٹر اور وزن 6 ہزار ٹن ہے ۔ آبدوز میں مہلک کے -15 میزائل نصب ہیں جو 750 کلومیٹر تک مار کرنے کی صلاحیت رکھتے ہیں۔ اس کی خاصیت یہ ہے کہ یہ دشمن کو چکمہ دینے اور اس کی گرفت میں آئے بغیر حملہ کرنے کی صلاحیت رکھتا ہے ۔ آبدوزیں ڈیڑھ ہزار فٹ سے زیادہ گہرائی تک پانی میں جا سکتی ہیں۔تیسری ایٹمی آبدوز ایرڈمین بھی ملک میں بنائی جا رہی ہے اور چند سالوں میں یہ بھی ہندوستانی بحریہ کے بیڑے میں شامل ہو جائے گی۔ اریہنت اور اریگھاٹ کے پاس 83 میگاواٹ کے ہلکے پانی کے ری ایکٹر ہیں جہاں سے وہ چلائے جاتے ہیں۔ نیوکلیئر ری ایکٹرز کی وجہ سے یہ آبدوزیں روایتی آبدوزوں کے مقابلے مہینوں زیادہ پانی کے اندر رہ سکتی ہیں۔
