فقید المثال حفاظتی بندوبست کے تحت سرینگر نشست کےلئے ووٹنگ کا عمل شروع

24امیداروں کی سیاسی تقدیر کا فیصلہ 17لاکھ 44ہزار اہل ووٹران کررہے ہیں
لوک سبھا نشست پر تکونی مقابلہ آرائی کا امکان ، آج صبح سے ہی پولنگ مراکز پر رائے دہندگان کی بھیڑ جمع
سرینگر/12 مئی/لوک سبھا انتخابات کے چوتھے مرحلے کے تحت سرینگر پارلیمانی نشست کےلئے سخت حفاظتی بندوبست کے دوران آج ووٹ ڈالے جارہے ہیں اور نشست پر 24امیدوار اپنی قسمت آزمائی کررہے ہیں جن کی سیاستی تقدیر کا فیصلہ 17لاکھ سے زائد ووٹران کررہے ہیں ۔ وائس آف انڈیا کے مطابق سرینگر پارلیمانی نشست میں آج لوک سبھا انتخابات کے چوتھے مرحلے کے تحت ووٹ ڈالے جارہے ہیں جس کےلئے حفاظت کے سخت بندوبست کئے جاچکے ہیں ۔ اتوار کو ہی پولنگ مراکز کو فورسز اور پولیس نے اپنی تحویل میں لیا تھا اور پولنگ عملہ اور آلات بھی اتوار کو ہی پولنگ مراکز تک پہنچائے جاچکے تھے ۔ آ ج صبح سے ہی پولنگ شروع ہوئی ہے ۔ ذرائع سے معلوم ہوا ہے ک سخت حفاظتی بندوبست کے بیچ لوک سبھا انتخابات کے چوتھے مرحلے کے تحت سرینگر پارلیمانی نشست کےلئے آج ووٹ ڈالے جارہے ہیں سرینگر نشست پر 17لاکھ 40ہزارسے زائد ووٹر اپنی رائے دہی کا استعمال کررہے ہیں جبکہ اس نشست پر 52ہزار کشمیری پنڈت بھی ووٹ کااستعمال کررہے ہیں ۔ سرینگر نشست میں پارلیمانی انتخابات کے دوران 2004-میں-18.57فیصدی ووٹ پڑے ،2009-میں- 25.55فیصدی ، 2014-میں – 25.86فیصدی ووٹ پڑے اور 2019-میں-14.43فیصدی ووٹنگ کی شرح رہی ۔سرینگر پارلیمانی نشست5اضلاع پر پھیلی ہوئی ہیں جس میں18اسمبلی حلقوں کو شامل کیا گیا ہے،جن میں حد بندی کے بعد تشکیل شدہ3 نئی اسمبلی نشستیں لال چوک،چھانہ پورہ ,سینٹرل شالہ ٹینگ بھی شامل ہے۔18 اسمبلی حلقوں میں کنگن،گاندربل،حضرتبل،خانیار،حبہ کدل،لال چوک،چھانہ پورہ،جڈی بل،سونہ وار،عیدگاہ، سینٹرل شالہ ٹینگ،خان صاحب،چرار شریف،چاڈورہ، پانپور، ترال،پلوامہ، راجپورہ اور شوپیاں قابل ذکر ہے۔وی او آئی کے مطابق سرینگر پارلیمانی نشست میں رائے دہندگان کی مجموعی تعداد17لاکھ44ہزار27ہے جن میں8لاکھ74ہزار48مرد اور98لاکھ69ہزا916خواتین رائے دہندگان کے علاوہ63خواجہ سراہ بھی شامل ہیں۔ تقریباً 52ہزار100 نقل مکانی کرنے والے رائے دہندگان سری نگر لوک سبھا حلقہ سے 13 مئی کو اپنے حق رائے دہی کا استعمال کررہے ہیں۔ ان میں سے25ہزار760 مرد ووٹر اور 26ہزار340 خواتین ووٹر ہیں جن کیلئے کل26 پولنگ اسٹیشن بنائے گئے ہیں، جن میں سے21 جموں، 4 دہلی اور ایک ادھم پور میں ہے۔الیکشن میں24امیدواروں کی سیاسی تقدیر قلمبند ہوگی۔ اس نشست پر نیشنل کانفرنس کی آغا روح اللہ،پی ڈی پی کے وحید الرحمان پرہ اور اپنی پارٹی کے محمد اشرف میر کے مابین تکونی مقابلے کا امکاں ہے جبکہ، ڈیموکریٹک پروگریسو آزاد پارٹی کے عامر، پینتھرس پارٹی کے امیدوار حقیت سنگھ، لوک تانترک پارٹی کی روبینہ اختر ،گنا سورکھشا پارٹی کے محمد یوسف بٹ،بھارت جوڑو پارٹی کے محمد یونس میرکے علاوہ آزاد امیدوار امین ڈار،جاوید احمد وانی،جبران فردوس ڈار،جہانگیر احمد شیخ،ریاض احمد بٹ،سجاد احمد ڈار،شاہ نواز حسین شاہ،شیبان عشائی،صائم مصطفی،غلام محمد وانی،فیاض احمد بٹ،ڈاکٹر قاضی اشرف،مرزا سجاد حسین بیگ،نثار احمد وانی،وحیدہ تبسم شاہ اور وسیم حسین شیخ بھی میدان میں ہیں۔