اگلے ہفتے تک جموں کشمیر کےلئے میٹروریل پروجیکٹ منظور ہوگا

جموں کشمیر کےلئے ایل پی جی گیس پائپ لائن کو ترجیح دی جارہی ہے
مرکزی سرکار کے عوامی رسائی مہم کے تحت مرکزی وزیر پیٹرولیم اینڈ نیچرل گیس ہردیپ سنگھ پوری نے آج کہا ہے کہ وزیر اعظم نریندر مودی کے ترقیاتی منصوبے کے تحت جموں کشمیر میں تعمیر و ترقی کا نیا دور شروع ہوچکا ہے ۔ انہوںنے کہا کہ مرکز اس بات کی طرف توجہ دے رہی ہے کہ مرکزی معاونت والی سکیموں کا فائدہ براہ راست مستحقین تک پہنچ جائے ۔ انہوں نے کہا کہ اُجولا یوجنا، آیوشمان بھارت، پی ایم آواس یوجنا اور دیگر مرکزی سکیموں کا لوگوں کو فائدہ مل رہا ہے ۔ انہوں نے ان باتوں کا اظہار جموں میں متعدد پروجیکٹوں کی افتتاحی تقاریب کے دوران کیا۔ پوری نے وزیر اعظم کے سوچھتا ابھیان سکیم شروع کرنے پر ان کی تعریف کرتے ہوئے کہا ہے کہ 2014میں گاندھی جی کے جنم دن پر لال قلعہ سے اس سکیم کا اعلان کیا گیا تھا جو آنجہانی مہاتما گاندھی کو حقیقی معنوں میں خراج عقیدت پیش کرنا ہے ۔ انہوںنے کہا کہ اسی طرح او ڈی ایف کے تحت ملک بھر میں ضرورت مند لوگوں کو بیت الخلاءفراہم کئے گئے اور پبلک ٹائلٹ کا قیام عمل میں لایا گیا ۔ انہوںنے کہا کہ ملک کے ساتھ ساتھ جموں کشمیر میں بھی اس سکیم کا فائدہ لوگوں کو پہنچا ہے ۔ انہوں نے کہا کہ سوچھتا ابھیان کی کامیابی کے پیچھے ‘جن آندھولن‘ ہے جس کو وزیر اعظم کی زیر نگرانی عمل میں لایا گیا اور اس سکیم کو صرف سرکاری اداروں تک ہی محدود نہیں رکھا گیا بلکہ اس میں تمام سرکاری اور نجی اداروں باالخصوص تعلیمی اداروں نے شرکت کی ۔ اس دوران مرکزی وزیر نے کہا کہ جموں کشمیر کےلئے میٹرو ریل پروجیکٹ کو اگلے ہفتے تک منظوری مل جائے گی جبکہ خطے کےلئے ایل پی جی گیس پائپ لائن سرکار کی ترجیحات میں شامل ہے ۔ انہوںنے کہا کہ جموں کشمیر کی تعمیر و ترقی کے منصوبے پر کوئی بھی سمجھوتہ نہیں کیا جائے گااور تعمیراتی پروجیکٹوں کےلئے حتمی تاریخ بھی ایجنسیوں کو دی گئی ہے اور سنٹرل پروجیکٹوں کو 26جنوری 2020سے قبل پائیہ تکمیل تک پہنچایا جائےے گا۔ اس دوران انہوں نے جانکاری فراہم کی کہ جموں کشمیر میں اب تک آٹھ کروڑ مستفیدین تک اُجولا یوجنا کے تحت ایل پی جی کنکشن پہنچے ہیں ۔ پوری نے مزید کہا کہ دفعہ 370کی منسوخی کے بعد ان پروجیکٹوں کی طرف خصوصی توجہ دی گئی جو برسوں سے التوا میں پڑے ہوئے تھے اور ان برسوں میں ان کو مکمل کیا جاچکا ہے ۔ اس موقعے پر انہوںنے مختلف سرکاری سکیموں کے تحت مستفیدین میں مالی مدد بھی تقسیم کی ۔