کولگام میں فوجی جوان لاپتہ، تلاش کے لئے آپریشن شروع، لواحقین نے فوجی جوان کو اغوا کرنے کا دعویٰ کیا

کولگام کے زائد از ایک درجن علاقوں میں تلاشی آپریشن ، سراغ رساں کتوں کی مدد سے باغات کو کھنگالا جارہا ہے
سری نگر، 30 جولائی (یو این آئی) جنوبی کشمیر کے ضلع کولگام کے استھال علاقے سے ایک فوجی جوان ہفتے کی شام سے لاپتہ ہے جس کی تلاش کے لئے کوششیں جاری ہیں۔ذرائع نے بتایا کہ کولگام کے استھال سے تعلق رکھنے والا ایک فوجی جوان ہفتے کی شام سے لاپتہ ہے۔انہوں نے بتایا: ‘وہ اپنی آلٹو گاڑی زیر نمبر JK -18B – 7201 میں کچھ چیزیں روٹی وغیرہ لانے کے لئے گیا تھا تب سے لاپتہ ہے اور گھر واپس نہیں لوٹا ہے’۔انہوں نے کہا کہ جاوید احمد وانی ولد محمد ایوب وانی نامی یہ فوجی جوان لداخ میں تعینات تھا عید کی چھٹیوں کے لئے گھر آیا تھا۔پولیس کے مطابق لاپتہ فوجی جوان کی تلاش کے لئے بڑے پیمانے پر تلاشی آپریشن جاری ہے۔دریں اثنا لاپتہ فوجی جوان کے اہلخانہ نے ان لوگوں جنہوں نے اس کو اٹھایا ہوگا، سے بیٹے کو رہا کرنے کی اپیل کی ہے۔مذکورہ جوان کے والد محمد ایوب نے میڈیا کو بتایا: ‘میرا بیٹا عید سے چھٹیوں پر تھا، شام کے وقت روٹی وغیرہ لانے کے لئے گیا کیونکہ کل اس کو واپس ڈیوٹی پر جانا تھا لیکن راستے میں ہی کسی نے اس کو اغوا کیا’۔انہوں نے اشک بار آنکھوں سے کہا: ‘میری اہلیہ عارضہ قلب میں مبتلا ہے، اس کے بغیر ہمارا کوئی کمانے والا نہیں ہے جس کسی نے بھی اس کو اغوا کیا ہے ان سے میری گذارش ہے کہ اس کو رہا کریں’۔انہوں نے پولیس اور فوج کا شکریہ کرتے ہوئے کہا: ‘میں پولیس اور فوج کا بہت شکر گذار ہوں جنہوں نے رات بھر تلاشی آپریشن چلایا’۔لاپتہ جوان کی والدہ نے بیٹے کی رہائی کی اپیل کرتے ہوئے کہا: ‘میرے جاوید کو رہا کریں، اس کو گھر واپس بھیج دیں، اگر اس سے کوئی غلطی ہوئی ہے تو اس کو معاف کریں’۔دریں اثنا فوج ، پولیس ، سی آر پی ایف اور ایس او جی نے کولگام کے درجنوں علاقوں کو محاصرے میں لے کر لاپتہ فوجی جوان کی بڑے پیمانے پر تلاش شروع کی ہے۔ ذرائع نے بتایا کہ پہاڑی علاقوں کے ساتھ ساتھ سیب کے باغات کو بھی کھنگالا جارہا ہے ۔ معلوم ہوا ہے کہ کھوجی کتوں کی مدد سے سیب کے باغات کو اتوار کی صبح سے ہی کھنگالا جا رہا ہے تاہم ابھی تک لاپتہ فوجی اہلکار کا کوئی ثبوت نہیں ملا ہے۔ فوج کے ایک سینئر عہدیدار نے بتایا کہ لاپتہ جوان کو تلاش کرنے کی خاطر اضافی کمک کو کولگام اور اس کے ملحقہ علاقوں میں تعینات کیا گیا ہے۔ انہوں نے کہاکہ ضلع بھر میں جگہ جگہ سیکورٹی فورسز کی تعیناتی عمل میں لائی گئی ہے جبکہ مشکوک نظر آنے والے افراد سے بھی پوچھ تاچھ کی جارہی ہیں۔ مذکورہ آفیسر نے بتایا کہ کولگام ضلع کے دور افتادہ علاقوں میں بھی تلاشی آپریشن شروع کیا تاہم ابھی تک لاپتہ فوجی جوان کا کوئی سراغ نہیں ملا ہے۔ یو این آئی