ہندوستانی سکھ اٹاری/واگھہ سرحد عبور کر کے پاکستان جائینگے

سکھ جتھا پاکستان کے ساکا پنجا صاحب کی صد سالہ تقریبات میں شرکت کرے گا
نئی دہلی، 27 اکتوبر (یو این آئی) ہندوستانی سکھوں کا ایک جتھا 30 اکتوبر کو پاکستان کے راولپنڈی سے 45 کلومیٹر دور پنجا صاحب جی گردوارہ میں منعقد ہونے والی ساکا پنجا صاحب کی صد سالہ تقریبات میں شرکت کرے گا۔ دہلی گوردوارہ کمیٹی کے صدر سردار ہرمیت سنگھ کالکا نے آج یہاں بتایا کہ کل 240 ہندوستانی سکھ 28 اکتوبر کو اٹاری/واگھہ سرحد عبور کر کے پاکستان جائیں گے ۔ اس جتھے میں قومی راجدھانی دہلی کے 40 عقیدت مند شرکت کریں گے ۔ جبکہ باقی 200 ممبران ملک کے مختلف حصوں سے آئیں گے ۔ انہوں نے کہا کہ یہ جتھا 2 نومبر کو وطن واپس آئے گا اور اپنے دورہ پاکستان کے دوران سکھوں کے تاریخی گوردواروں پنجا صاحب، سری ننکانہ صاحب اور لاہور کے مقدس گردواروں پر متھا ٹیکے گا۔ ساکا پنجا صاحب کے بارے میں انہوں نے کہا کہ 30 اکتوبر 1922 کو جب انگریز حکام امرتسر میں اپنے مطالبات کے لیے پرامن احتجاج کرنے والی سکھ برادری کو جابرانہ پالیسیوں کے تحت دور دراز کی جیلوں میں قید کرنے کے لیے ٹرین کے ذریعے لے جا رہے تھے تو کمیونٹی کو جیسے ہی اس بات کا علم ہوا تو پنجا صاحب کی سکھ برادری نے ٹرین کو روک کر معصوم سکھوں کو لنگر فراہم کرنے کا فیصلہ کیا تاہم مقامی حکام نے ٹرین کو پنجا صاحب ریلوے اسٹیشن پر روکنے سے انکار کر دیا جس کے باعث سکھ برادری کے لوگ ریلوے کی پٹری پر بیٹھ گئے اور کچھ غیر مسلح مظاہرین ٹرین کی زد میں آ کر ہلاک ہو گئے ۔ اس سانحہ نے لوگوں میں شدید غم و غصہ پیدا کر دیا جس نے تحریک آزادی کو ایک نئی طاقت دی۔تقسیم سے قبل ان شہداءکی یاد میں 30 اکتوبر سے 2 نومبر تک پنجا صاحب میں خراج عقیدت پیش کرنے کا پروگرام منعقد کیا جاتا تھا۔ دہلی گردوارہ کمیٹی کے جنرل سکریٹری سردار جگدیپ سنگھ کاہلون نے کہا کہ یاتریوں کو بس/ٹرین سے سفر کرایا جائے گا جس کی اوسط قیمت تقریباً 6000 روپے بتائی گئی ہے ۔ یاتریوں کے قیام/لنگر کے انتظامات گردواروں میں کیے جائیں گے اور حکومت پاکستان کی جانب سے تمام یاتریوں کیلئے علیحدہ کمرے مختص کیے جائیں گے ۔