پونچھ میں مسافر بردار گاڑی گہری کھائی میں جاگری بارہ موقع پر ہی 12 از جان

ایل جی منوج سنہا نے مہلوکین میں فی کس پانچ لاکھ اور زخمیوں کو ایک لاکھ روپیہ دینے کا اعلان کیا
پونچھ میں سڑک کے ایک دلدوز حادثے میں بارہ افراد ہلاک جبکہ دو درجن سے زائد افراد زخمی ہوئے۔ جموں وکشمیر کے لیفٹیننٹ گورنر نے حادثے پر گہرے رنج وغم کا اظہا رکرتے ہوئے مہلوکین کے حق میں فی کس پانچ لاکھ اور زخمیوں میں ایک لاکھ روپیہ دینے کا اعلان کیا۔یو پی آئی کے مطابق پونچھ ساجیاواں علاقے میں بدھ کی صبح سواریوں سے کھچا کھچ بھری ہوئی ایک مسافر بردار گاڑی ڈرائیور کے قابو سے باہر ہو کر گہری کھائی میں جاگری جس وجہ سے گاڑی میں سوار چالیس افراد خون میں لت پت ہوئے۔ حادثے کی اطلاع ملتے ہی پولیس ، فوج اور مقامی لوگ جائے موقع پر پہنچے اور زخمیوں کو طبی امداد کی خاطر نزدیکی ہسپتال منتقل کیا تاہم ڈاکٹروں نے بارہ مسافروں کو مردہ قرار دیا جبکہ دیگر دو درجن کے قریب افراد میں سے آٹھ کی حالت بھی نازک بنی ہوئی ہے۔ مہلوکین کی شناخت 14 سالہ معروف احمد،40 سالہ بشیر احمد،18 سالہ روضیہ اختر،40 سالہ زرینہ بیگم،65 سالہ محمد حسین، 20 سالہ ناظمہ اختر،5سالہ عمران احمد،70 سالہ عبدالکریم اور 40 سالہ عبدالقیوم کے بطور ہوئی ہے جب سب مقامی باشندے ہیں۔انہوں نے کہا کہ زخمیوں کو علاج و معالجے کے لئے ہسپتال منتقل کیا گیا جن میں سے گیارہ کی حالت نازک بتائی جا رہی ہے۔جموں وکشمیر کے لیفٹیننٹ گورنر منوج سنہا نے اس سڑک حادثے پر گہرے رنج کا اظہار کیا ہے اور مہلوکین کے لواحقین کو پانچ لاکھ روپیے معاوضہ دینے کا اعلان کیا ہے۔انہوں نے مہلوکین میں فی کس پانچ لاکھ اور زخمیوں کو ایک لاکھ روپیہ دینے کا اعلان کیا۔ دریں اثنا جموں وکشمیر نیشنل کانفرنس کے صدر ڈاکٹر فاروق عبداللہ اور نائب صدر عمر عبداللہ نے ساوجیاں پونچھ میں دلدوز اور دلخراش سڑک حادثے میں 11افراد کے لقمہ اجل بن جانے اور20افراد کے شدید زخمی ہونے پر زبردست رنج و الم کا اظہار کیا ہے۔ دونوں لیڈران نے حادثے میں لقمہ اجل بنے افراد کے اہل خانہ اور لواحقین کے ساتھ دلی تعزیت کا اظہار کیا ہے۔ انہوں نے لقمہ اجل بنے کے لواحقین کو یہ صدمہ عظیم برداشت کرنے کیلئے اللہ سے دعا مانگی۔ انہوں نے حکومت سے اپیل کی کہ وہ زخمی ہوئے افراد کو بہتر سے بہتر علاج و معالجہ یقینی بنائے اور لقمہ اجل بنے افراد کے پسمادگان کے حق میں ایکش گریشیا ریلیف فراہم کی جائے۔ انہوں نے ٹریفک حکام سے اپیل کی کہ ٹریفک نظام میں معقولیت لانے کیلئے ٹھوس اقدامات کریں۔ لیڈران نے کہا کہ حالیہ ایام میں خطہ چناب و پیرپنچال آئے روز خوفناک حادثے متواتر طور پر پیش آرہے ہیں اور حکومت کی جانب سے انسانی جانوں کے اتلاف کو روکنے کیلئے کوئی بھی ٹھوس اقدام نہیں کیا جارہا ہے۔ انہوں نے کہا کہ سڑکوں کی بدترین صورتحال، اووروں لوڈنگ اور دیگر ٹریفک کی خلاف ورزیوں کو اَن دیکھا کرنے سے ایسے حادثات مسلسل پیش آرہے ہیں، جن میں بڑے پیمانے پر قیمتی جانوں کی تلافی ہورہی ہے۔